SQO-da jyl basynan beri 1 myńnan astam jaıaý júrginshi jol erejesin buzǵan
PETROPAVL. QazAqparat – Soltústik Qazaqstan oblysynda jyl basynan 1134 jaıaý júrginshige ákimshilik hattama toltyryldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, júrginshilerdiń joldy belgilenbegen jerden kesip ótýi kóp jaǵdaıda jol apatynyń týýyna sebep bolyp jatady. Olar óz bastaryn ǵana qaterge tigip qoımaı, qalǵan jol qozǵalysyna qatysýshylarǵa da qaýip tóndiredi.
«Jaıaý júrginshiler kóbine iri saýda oryndarynyń janynda jol erejelerin buzady. Petropavl qalasynda ol ýchaskeler Astana, Internatsıonal, Abaı kóshelerinde, Ortalyq kóterme saýda bazary, «Altyn arman» bazary jáne «Taıga» saýda ortalyǵy turǵan Jambyl kóshesinde ornalasqan. Bul jerlerde aǵylǵan kólik, ári jol shetinde turǵan mashınalardan kórý shektelgen. Jolǵa atyp shyqqan júrginshini kólik júrgizýshisi baıqamaı qalady. Baıqaǵan kúnniń ózinde ony basyp ketpeýi úshin basqa kólikke soǵylýy múmkin. Keıbir júrginshiler baǵdarshamnyń jasyl túsi janbaı jatyp, joldan óte bastaıdy. Endi biri qulaqqap kıip júredi, olar kóliktiń eskertken dybysyn estimeı qalýlary múmkin», - deıdi Petropavl PB patrýldi polıtsııa batalony komandıriniń orynbasary Bolat Jumaǵazın.
Jyl basynan beri QR ákimshilik quqyq buzý kodeksiniń 615-baby boıynsha polıtseıler 1134 hattama toltyrǵan. Tártip saqshylarynyń aıtýynsha, basty mindet - jazalaý emes, jol qozǵalysyna qatysýshylardyń ólimi men jaraqat alýyna alyp keletin jol-kólik apattarynyń aldyn alý.
Jalpy jyldyń alǵashqy eki aıynda oblys joldarynda 8 júrginshi jol apatynan zardap shekken.
