SQO-da jyl basynan 8 adam poıyz astyna túsip, mert boldy
PETROPAVL. QazAqparat - Soltústik Qazaqstan oblysynda bıyl temir jolǵa qatysty oqys oqıǵalar kúrt artyp, soynń saldarynan 8 adam mert boldy, dep habarlaıdy «QazAqparat» HAA tilshisi.
Temir jol qala ortalyǵy men Jumysshy kentin bólip ótedi. Baǵyttyq avtobýstar qatynaǵanymen sharýalarymen asyqqan jurt kóp jaǵdaıda qaýipsizdikti esten shyǵarady. Poıyz astyna túskenderdiń basym bóligi jol qysqartpaq bolǵan eken. Sonyń saldarynan tek bıyldyń ózinde 10 adamdy poıyz qaqty. Segiz adam sol jerde jan tapsyrsa, ekeýi jaraqat alyp aýrýhanaǵa tústi. Barlyǵy qarapaıym qaýipsizdik erejelerin jatqa biletin, aqyl toqtatqan eresek adamdar.
Byltyr SQO-da 3 adam poıyz astyna túsip, qaza tapty. Tártip saqshylary ereje buzýshylarmen kúresti kúsheıtken, aıyppuldyń mólsheri de az emes – 3 AEK mólsherinde.
«Jyl basynan temir joldyń belgilenbegen jerinen ótken 1150 adamǵa ákimshilik hattama toltyryldy. Jol boıynda mal baqqan turǵyndarǵa da aıyppul salyndy. Mundaı 4 jaǵdaı tirkelip otyr. Qatty kele jatqan poıyz júrgizýshisi joldaǵy adamdy kórse de, toqtap úlgermeıdi. Olar ózderin ǵana emes, ózgelerdiń ómirlerin de qaterge tigedi», - deıdi Petropavl stansasy Jelilik polıtsııa bólimi ákimshilik polıtsııa basqarmasy bastyǵynyń mindetin atqarýshy Uljan Jarqulova.
Temir jol qyzmetkerleri oqys oqıǵalardyń artqanyna alańdap otyr. Mamandar ólim-jitimniń aldyn alý úshin, jergilikti turǵyndar arasynda túsindirý jumystaryn júrgizedi. Qazir óńirde «Temir joldaǵy balalardyń qaýipsizdigi» aktsııasy bastaldy. Jedel aldyn alý sharasy qazan aıyna deıin jalǵasady.
