SQO-da jyl basynan 67 jemqorlyqpen baılanysty qylmystyń beti ashyldy
PETROPAVL. QazAqparat - Áleýmettik saýalnama nátıjesinde Soltústik Qazaqstan oblysy sybaılas jemqorlyq kórsetkishi boıynsha tizim sońynda turǵany belgili boldy, dep habarlaıdy «QazAqparat» AA tilshisi QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaevqa silteme jasap.
SQO ákimdiginde ótken jıynda Alık Shpekbaev óńirdegi sharýany ǵana emes, sonymen qatar jemqorlyqpen kúrestiń álemdik tájirıbesi, jemqorlyqqa qarsy zań normalary, jazalaý sharalary jóninde baıandady. Ol vedomstvo óz jumysynda jemqorlyqpen baılanysty zańbuzýshylyqtardyń aldyn alýyna úlken mán beretinin jetkizdi.
«Bizdiń mindetimiz - memlekettik qyzmetkerler, turǵyndar arasynda jemqorlyqqa qarsy mádenıet qalyptastyrý. Qoǵam jemqorlyqty joıýǵa jappaı jumylǵanda ǵana jeńe alady», - dep sanaıdy Alık Shpekbaev.
SQO-nyń sybaılas jemqorlyqqa qarsy qyzmetiniń qorytyndysy boıynsha ótken jyly 96 qylmys tirkelse, bıyl olardyń sany 67-ni quraǵan. Bıyl jemqorlyq qylmysy boıynsha Aıyrtaý jáne Taıynsha aýdandary, Petropavl qalasy kósh basynda.
Sondaı-aq, Alık Shpekbaev sybaılas jemqorlyq boıynsha júrgizilgen áleýmettik saýalnama nátıjesine sáıkes, Soltústik Qazaqstan oblysy sońǵy orynda ekenin atap ótti.
SQO ákimi Erik Sultanov óńirde jemqorlyqqa qarsy keshendi sharalar únemi atqarylatynyn aıtty.
«Sybaılas jemqorlyqqa qarsy jáne jergilikti atqarýshy organdar janyndaǵy kóleńkeli ekonomıkany boldyrmaý strategııasyn júzege asyrý aıasynda ákimshilik-terrıtorııalyq birlik ákimderi sybaılas jemqorlyqqa qarsy vedomstvoaralyq komıssııa jumys isteıdi», - dedi oblys ákimi.
