SQO-da jyl basynan 647 iri qara maldan brýtsellez aýrýy tabylyp, kózi joıyldy
PETROPAVL. QazAqparat – Soltústik Qazaqstan oblysynda tórt túlikke kúzgi vaktsına egý jumystary qyzý júrgizilip jatyr, dep habarlaıdy QazAqparat tilshisi.
Mal dárigerleri vaktsınatsııany jylyna eki ret júrgizedi. Birinshisi kóktemde túlik jaıylymǵa shyǵarda, al ekinshisi kún sýytyp, qoraǵa kirgizer aldynda atqarylady. Óńirde búgingi kúni bul jumystar 65%-ǵa isteldi.
Elimizde «Profılaktıkasy, dıagnostıkasy jáne joıylýy bıýdjet qarajaty esebinen júzege asyrylatyn janýarlardyń asa qaýipti aýrýlarynyń tizbesi» bekitilgen. Oǵan tórt túliktiń asa qaýipti 69 aýrýy kirgen. SQO-da onyń 9 túrine bıýdjet qarajaty esebinen ekpe jasalsa, týberkýlez, brýtsellez sııaqty taǵy birneshe túrine dıagnostıkalyq zertteýler júrgiziledi.
«Mal egý manıpýlıatsııasy durys jolǵa qoıylǵan, mal ıesi óziniń malyn ektirýge ákelýi tıis. Túliktiń syrǵasy bar, qujaty bar. Munyń bári tegin jasalady. Tórt-túlikti zertteý kezinde qan alamyz. Eger de qandaı da bir maldan aýrý belgileri baıqalsa syrǵasy arqyly taýyp, birden soıýǵa jiberemiz», - deıdi SQO veterınarııa basqarmasynyń veterınarlyq is-sharalardy uıymdastyrý bóliminiń jetekshisi Qaıyrly Qazanov.
Osy kúnge deıin 284 myńnan astam iri qara mal, 640 bas jylqy, 32 myńnan astam shoshqa jáne 319 myńnan astam qoı-eshki brýtsellezge zertteldi. 647 iri qara maldan, 19 qoıdan aýrý belgileri tabylyp, sanıtarly soıylymǵa jiberilipti. Al týberkýlez 52 sıyrdan anyqtalǵan.
Egý jumystary qyrkúıek aıynan qarashaǵa deıin júrgiziledi. Óıtkeni vaktsına qoıýdyń óz erejeleri bar. Veterınarlardyń aıtýynsha, bir ekpeden keıin ekinshisin salmas buryn 21 kún ótýi qajet. Sibir jarasyna qarsy vaktsına malǵa 3 aıdan asqannan keıin ǵana egiledi, jas tól dárini kótermeýi múmkin.
«Biz qazir Penkovo eldi-mekeninde týberkýlez aýrýyna zertteý júrgizý úshin qan alyp jatyrmyz. Odan keıin juqpaly aýrýdyń aldyn alý úshin arnaıy preparat – týberkýlındi egemiz. 72 saǵattan keıin kelip janýardy qaıta tekserip ketemiz. Denesinde túıin paıda bolsa, ol malda aýrýdyń belgileri bar degen sóz. Al qannyń nátıjesi 3 kúnde daıyn bolady», - deıdi mal dárigeri Lıýdmıla Stepanova.
Sondaı-aq oblys veterınarlary aldaǵy 2-3 aıda bıylǵy jyldyń tóli - 102,5 myńnan astam iri qara maldy jáne 129 myńnan astam qoı-eshkini tirkeýge alyp, qulaqtaryna syrǵa taǵýlary tıis.
