SQO-da jyl basynan 250 lıtrden astam alkogol tárkilendi
PETROPAVL. QazAqparat – Soltústik Qazaqstan oblysynda qańtar aıynan bastap tártip saqshylary reıd barysynda 250 lıtrden astam zańsyz saýdalanǵan spırttik ishimdikterdi tárkiledi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Petropavldyń 62 jastaǵy turǵyny bazardaǵy dúńgirshekterdiń birinde spırt satyp kelgen. Tártip saqshylary ony profılaktıkalyq reıd barysynda anyqtady. Saýdagerden 135 lıtr spırt tárkilendi. Er adam onyń bir lıtrin 1500 teńgeden saýdalap kelipti. Zańsyz saýdalanǵan spırt tárkilenip saraptamaǵa jóneltildi. Al zańdy belden basqan saýdagerge «Tıisti tirkeýsiz, ruqsatsyz nemese habarlama jibermeı kásipkerlik nemese ózge de qyzmetpen aınalysý, sondaı-aq áreketterdi (operatsııalardy) júzege asyrý» baby boıynsha ákimshilik is qozǵaldy. Jınalǵan materıal sheshim qabyldaý úshin mamandandyrylǵan ákimshilik sotqa jiberiledi.
SQO PD bastyǵynyń birinshi orynbasary Qanat Aıtbaevtyń aıtýynsha, qańtar aıynyń basynan beri oblys polıtseıleri zańsyz kásipkerlikpen aınalysýdyń 8 faktisin anyqtady. 250 lıtrden astam spırt tárkilendi.
Byltyr SQO aýmaǵynda masań kúıde jasalǵan 853 qylmys tirkelgen. 10 500-den astam quqyq buzýshy alkogoldik sýsyndardy ishkeni, qoǵamdyq oryndarda mas kúıde júrgeni úshin jaýapqa tartylǵan. Zańsyz aınalymnan 1242 lıtr spırt alyndy.
Al 14 qańtardan oblys aýmaǵynda «Zań buzýshy» jedel-profılaktıkalyq is-sharasy bastaldy. Onyń maqsaty – otbasylyq-turmystyq, sondaı-aq mas kúıde jasalatyn qylmystar men quqyq buzýshylyqtardyń aldyn alý.
