SQO-da jyl basynan 20-ǵa jýyq kólik órtenip ketti
PETROPAVL. QazAqparat – Soltústik Qazaqstan oblysynda bıyl 17 mashına órtenip ketti, sonyń 15-i jeńil kólik. Osyǵan oraı órt sóndirýshiler avtokólikte órt shyqqan jaǵdaıda ne isteý qajettigi jóninde kólik ıelerine birqatar keńes berdi, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, kún jylynysymen qys boıy turǵan kólikterdiń jolǵa shyǵýymen jáne saıajaı maýsymynyń bastalýymen kólik nópiri artady. Bul jol-kólik oqıǵalarynyń artýyna ákeledi jáne kólikterde órt shyǵý jaǵdaılary da jıileıdi. Jyl bastalǵaly óńirde osyndaı 17 órt tirkeldi, sonyń 15-i jeńil kólikke qatysty. Qalǵan ekeýinde júk kóligi janyp ketti. Eń sońǵy jaǵdaı 30 sáýir kúni Petropavldaǵy Chaıkovskıı kóshesinde boldy. Mamandar kelgenshe kólik otqa oranyp, gaz qondyrǵysy jaryldy. Adam shyǵyny joq.
«Órttiń aldyn alý úshin avtokólikti tehnıkalyq tekserýden ótkizgen jón. Sondaı-aq mindetti túrde mashınada órt sóndirgish qural bolýy kerek. Onyń ózine qoıylatyn talaptar bar, máselen salmaǵy 2 keliden kem bolmaýy tıis jáne kóbine untaq tárizdes órt sóndirgish qoldanylady. Bizdiń qyzmetkerler órt sóndirgish quralyn tekserýge atysty reıdke jıi shyǵady. Baıqaǵanymyz, qural ár mashınada bar, alaıda sony ekiniń biri tez arada alyp shyǵyp, qoldana almaıdy. Ádette ol júk salǵyshtyń eń túbinde, qol ońaılyqpen jetpeıtin jerde jatady. Al avtokólik órtengen kezde onyń tolyq janyp ketýine kem degende 5 mınýt jetkilikti», - deıdi SQO TJD bastyǵynyń orynbasary Dmıtrıı Rastıhın.
Mamannyń atýynsha, avtokólik órtengen jaǵdaıda eń aldymen órt sóndirýshilerge habar bergen jón. Tek sosyn ǵana kóliktegi jalyndy aýyzdyqtaýǵa kirisý kerek.
«Ádette kólikte órt aspaptar panelinde nemese kapot astynan motor turǵan jerden shyǵady. Eger motor turǵan jerden shyqsa, onda kapotty abaılap ashý qajet. Óıtkeni kapotty ashqan kezde jalyp lap etip, beti-qoldy sharpýy múmkin. Al qol astynda órt sóndirgish qural bolmaǵan jaǵdaıda órtpen kúresý úshin sýdy, topyraq pen qumdy paıdalanýǵa bolady. Órtti jeıde nemese kıim-keshekpen sóndirý – bosqa ýaqyt ótkizý dep esepteımin. Al kim kóligine gaz qondyrǵysyn ornatpaq – ony tek arnaıy mamandandyrylǵan oryndarda ǵana qoıǵyzý kerek. Keıin mindetti túrde quzyrly mekemede tirkeýden ótkizý qajet. Óıtkeni ony teksertpeı qoldaný – adam ómirine qaýipti», - deıdi Dmıtrıı Rastıhın.
