SQO-da jyl basynan 19 mas júrgizýshi sottaldy
PETROPAVL. QazAqparat – Soltústik Qazaqstan oblysynda mas kúıde rólge otyryp, kólik basqarǵan 13 júrgizýshiniń bas bostandyǵy shekteldi, úsheýi jazasyn túzetý mekemelerinde óteıdi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Shal aqyn aýdany polıtsııa bóliminiń arnaıy turaǵyna «MTZ-82» traktory qoıyldy. Ony 18 shildede nómiri bolmaýyna baılanysty avtopatrýl toqtatqan.
«48 jastaǵy júrgizýshiden alkogoldiń ıisi shyǵyp turǵan, aıaǵyn durys basa almaǵan. Soǵan qaramastan ol medıtsınalyq kýálandyrýdan ótýden bas tartty. Tekserý barysynda júrgizýshiniń ótken kúzde 3 jylǵa kólik basqarý quqyǵynan aıyrylǵany belgili boldy», - deıdi tártip saqshylary.
Endi mas ustalǵan júrgizýshi iri mólsherde aıyppul tóleýi nemese 5 jylǵa bas bostandyǵynan aıyrylýy múmkin. Sondaı-aq ómir boıyna kólik júrgizý quqyǵynan aıyrylady.
Jambyl aýdanynda egistik arqyly ótetin avtojolda Qostanaı oblysynyń 49 jastaǵy turǵyny «Volkswagen Caravelle» avtokóliginiń róline ıe bola almaı qalyp, aýdarylǵan. Mas júrgizýshi jaraqat alyp, aýrýhanaǵa jatqyzyldy. Buǵan deıin ol mas kúıde kólik júrgizgeni úshin eki ret jaýapqa tartylǵan. Sot sheshimimen 2025 jylǵa deıin kólik basqarýǵa quqyǵy bolmaǵan.
«Mas kúıde kólik basqarý jol qozǵalysy erejelerin óreskel buzý bolyp esepteledi. Qańtar aıynan bastap basqarý quqyǵynan aıyryla tura, mas kúıde kólik júrgizgender úshin jaza qatańdatyldy. Tájirıbe kórsetkendeı, bul jol qaýipsizdigin qamtamasyz etýge baǵyttalǵan qajetti zańnamalyq qadam», - deıdi oblystyq PD bastyǵynyń mindetin atqarýshy Eńbek Sembın.
Jyl basynan óńirde polıtseıler kólikti mas kúıde basqarýǵa qatysty 36 isti sotqa joldady. 19 qylmystyq is boıynsha 13 júrgizýshiniń bas bostandyǵy shekteldi, 3-ýi jazasyn túzetý mekemelerinde óteıdi. Ekeýi qoǵamdyq nemese túzetý jumystaryna tartyldy. Olardyń barlyǵy ómir boıyna kólik basqarý quqyǵynan aıyryldy.
