SQO-da jyl bastalǵaly 913 velosıped urlyǵy tirkeldi
PETROPAVL. QazAqparat – Soltústik Qazaqstan oblysynda velosıped urlyǵy órshidi. Jyl bastalǵaly beri osyndaı 913 fakti tirkelgen, dep habarlaıdy QazAqparat tilshisi.
Velosıped urlyǵy – maýsymdyq qylmys. SQO polıtsııa departamenti baspasóz qyzmetiniń málimetinshe, bıyl 913 velosıped qoldy bolǵan. Tájirıbe kórsetkendeı, urlyqtyń bul túri negizinen qar joq kezde, sáýir men qarasha aılarynyń aralyǵynda jasalady.
Tártip saqshylary velosıped urlyǵynyń kúrt artýyn eki dóńgelekti kólikke otyrýshylar sanynyń kóbeıýimen baılanystyrady.
«Urylar velosıpedterdi sol kúıinde sata almaıtyn bolǵandyqtan, buzyp, qosalqy bólshek retinde ózindik qunynan aıtarlyqtaı tómen baǵaǵa satady. Velosıpedteriniń qoldy bolýyna kóp jaǵdaıda ıeleriniń ózderi de kináli. Eki dóńgelekti kólikti úı podezderinde jáne kóp qabatty turǵyn úılerdiń aýlalarynda qaraýsyz qaldyrady», - deıdi Petropavl qalasy PB bastyǵynyń mindetin atqarýshy Álibek Ǵabdýllın.
Máselen, jazdyń basynda Petropavldaǵy Vasılev kóshesindegi ashyq jatqan podezden birden úsh velosıped urlandy. Ieleri eki dóńgelekti kóliktiń joǵalǵanyn birneshe kúnnen keıin ǵana baıqaǵan. Keltirilgen shyǵynnyń jalpy somasy 400 myń teńgeden asady. Jedel izdestirý is-sharalary nátıjesinde kúdiktiler ustaldy. Olar Nur-Sultan qalasynyń 19 jáne 22 jastaǵy turǵyndary bolyp shyqty. Urlanǵan múlik ınternet arqyly satylǵan. Eki velosıped tabylyp, ıelerine qaıtaryldy.
«Óz múlkińizdi az ýaqytqa bolsa da qaraýsyz qaldyrmańyz. Velosıpedti podezderde, túngi ýaqytta úı janynda qaldyrý qaýipti, arnaıy qulyptaý qurylǵysy bolsa da, olardy jertólede nemese páterde saqtaǵandaryńyz abzal. Ustalǵan, qujattary joq velosıpedterdi satyp almaǵan jón. Onyń urlanǵandyǵy anyqtalǵan jaǵdaıda tárkilenedi», - deıdi Álibek Ǵabdýllın.
Foto: Shutterstock
