SQO-da júzigin ózi sheshe almaǵan áıel qutqarýshylardan kómek surady
PETROPAVL. QazAqparat – Soltústik Qazaqstan oblysynda allergııanyń saldarynan isinip ketken áıel ózdiginen saqınasyn sheshe almaı, qutqarýshylardyń kómegine júgindi, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, 18 aqpan kúni saǵat 13.43-te qutqarý qyzmetine kómek suraǵan áıel habarlasqan. Aıtýynsha denesi isinip, saýsaǵyndaǵy saqınasy sheshilmeı qalǵan.
Qutqarýshylar kelgenshe deıin saqınany ózdiginen sheshýge árekettengenimen onysynan túk shyqpaǵan. Allergııanyń saldarynan denesi isinip, saqına qysqandyqtan saýsaǵy qyzaryp ketken.
Oqıǵa ornyna kelgen qutqarýshylar altyn saqınany arnaıy qysqyshpen kesip aldy. Áıelge medıtsınalyq kómektiń qajeti bolmady.
«Osydan bir kún buryn ǵana taǵy bir qyzǵa saqınasyn sheshýge kómektestik. Ol da saýsaǵy isip, ózdiginen sheshe almaǵan. Jalpy zergerlik buıymdardy tańdaǵanda abaı bolyńyz. Saýsaqqa shaq etip tańdańyz jáne uzaq ýaqyt taqpańyz», - deıdi qutqarýshylar.
