SQO-da júıeli túrde para alǵan laýazymdy tulǵa ustaldy

PETROPAVL. QazAqparat –Petropavl qalasy ákimdiginiń halyqty jumyspen qamtý ortalyǵynyń laýazymdy tulǵasy memlekettik baǵdarlama aıasynda jastarǵa tegin berilýi tıis baspanalarǵa para alý arqyly ornalastyryp otyrǵan, dep habarlaıdy QazAqparat tilshisi.

Soltústik Qazaqstan oblysy sybaılas jemqorlyqqa qarsy qyzmettiń málimetinshe, Petropavl qalasy ákimdigi halyqty jumyspen qamtý ortalyǵynyń laýazymdy tulǵasy júıeli túrde para aldy degen kúdikke ilindi. Ol ortalyqtyń balansyndaǵy jalǵa beriletin kommýnaldyq úıden baspanany para bergenderge ońdy-soldy taratqan.

Kommýnaldyq jalǵa beriletin páterler 29 jasqa deıingi baspanaǵa muqtaj jastarǵa 2017-2021 jyldarǵa arnalǵan «Eńbek» nátıjeli jumyspen qamtýdy jáne jappaı kásipkerlikti damytý» baǵdarlamasy aıasynda berilýi kerek. Olar munda 5 jylǵa deıin tegin turyp, óz baspanalaryna qarajat jınaı alady.

Sheneýnik ózine júktelgen memlekettik baǵdarlamany oryndaý jáne iske asyrý mindetin paıdalanǵan. Senimdi adamdary arqyly turǵyn úıge muqtaj jandardy izdestirip, solar arqyly páter bergeni úshin aqsha alyp otyrǵan. Para somasy turǵyn úıdiń sharshysyna baılanysty 550 myńnan 800 myń teńgege deıin ózgerip otyrǵan.

Laýazymdy tulǵa men onyń sybaılastaryna qatysty 2 aı merzimge kúzetpen ustaý túrindegi bultartpaý sharasy sanktsııalandy.

Іstiń mán-jaıy tergeý múddesine oraı jarııa etilmeıdi.