SQO-da jurttyń jerin talan-tarajǵa salǵan seriktestik ústinen qylmystyq is qozǵaldy

PETROPAVL. QazAqparat – Soltústik Qazaqstan oblysynda «Jarqyn SK» jaýapkershiligi shekteýli seriktestigi halyqtyń ózine senip tapsyrǵan jerin ruqsatsyz kepilge qoıyp, 500 mln teńge nesıe alǵan. Alaıda bereshegin qaıtarmaǵandyqtan jer ýchaskeleri satylymǵa qoıyldy, dep habarlaıdy QazAqparat tilshisi.

SQO prokýratýrasynyń málimetinshe, Aıyrtaý aýdandyq prokýratýrasy «Aýyl sharýashylyǵy jerlerin tıimdi paıdalaný» vedomstvoaralyq baǵdarlamasyn júzege asyrý aıasynda zańbuzýshylyqty anyqtady. Aýdandaǵy «Jarqyn SK» JShS-ge jer úlesterin senip tapsyrǵan 883 adamnyń quqyǵy buzylǵan.

Seriktestiktiń quryltaıshylary halyqtyń jerin ruqsatsyz memlekettik qarjy ınstıtýttarynyń birine kepilge qoıyp, 500 mln teńgeden astam nesıe resimdegen. Alaıda qaryzdy qaıtarmaǵandyqtan qarjy ınstıtýty jer telimderin saýdaǵa shyǵarý arqyly óndirip almaq boldy.

«Qazirgi ýaqytta saýda-sattyq júrgizý protsedýrasy ýaqytsha toqtatyldy. Jer ýchaskelerin zańsyz kepilge qoıǵany úshin, bir top adamnyń aryzy boıynsha Aıyrtaý aýdandyq prokýratýrasy «Jarqyn SK» JShS ústinen QR Qylmystyq kodeksiniń 190 baby boıynsha qylmystyq is qozǵady. Budan basqa aýdandyq prokýratýra paı ıeleriniń múddesin qorǵaý maqsatynda kepil kelisimshartyn jáne jalpy jınalystyń hattamasyn zańsyz dep tabý úshin qajetti qujattar men materıaldardy jınaýdy bastady», - delingen oblystyq prokýratýra taratqan aqparatta.

«Jarqyn SQ» JShS jumysshylaryna da qaryz. 78 adamǵa eńbekaqy boıynsha bereshek 33,6 mln teńgeni quraıdy. Osyǵan baılanysty Aıyrtaý aýdandyq ishki ister bóliminde eńbek zańnamasyn buzý boıynsha qylmystyq is óndiriste jatyr.