SQO-da júrek yrǵaǵy buzylǵan naýqastarǵa ımplant qoıyla bastady
PETROPAVL. QazAqparat – Soltústik Qazaqstan oblysyndaǵy kardıologııalyq ortalyqta Nur-Sultan qalasynan kelgen Ulttyq ǵylymı medıtsınalyq ortalyqtyń mamany sheberlik saǵatyn ótkizip, 72 jastaǵy óńir turǵynyna kardıoverter-defıbrıllıator ımplantatsııasy jasaldy, dep habarlaıdy «QazAqparat» HAA tilshisi.
Nur-Sultan qalasynan kelgen Ulttyq ǵylymı medıtsınalyq ortalyqtyń arıtmolog dárigeri Qýandyq Sadýevtiń aıtýynsha, kardıoverter-defıbrıllıator qurylǵysy júrektiń kenetten toqtap qalýynyń aldyn alady. Qazaqstanda qondyrǵy burynnan qoldanylǵanymen SQO mamandary úshin bul tyń ádis.
«Ota jergilikti anestezııa arqyly júrgizilip, naýqas esin bilip jatady. Buǵananyń astyna shaǵyn tilik jasalady. Tamyr arqyly bir nemese eki elektrod ótkizip, júrektiń bulshyqetine jalǵaımyz. Onyń ekinshi basy qondyrǵyǵa bekitiledi. Implant keýde bulshyqetiniń astyna ornalastyrylady. Ol júrek qaǵysyn qadaǵalap otyrady. Júrek toqtap qalsa, elektrodtar razrıad berip, yrǵaǵy qalpyna keltiriledi», - deıdi Qýandyq Sadýev.
Kardıoverter-defıbrıllıatordyń úlkendigi 2 sireńke qorabyndaı ǵana. Elektrondy qurylǵy 5-7 jyl jumys isteıdi.
«Men ózim osynda 100-den satam ota jasadym. Adamnyń jas ereksheligine qaramaımyz, 18 jastaǵy jigitke de osyndaı ımplant qoıǵan kezim boldy. SQO-da mundaı ota alǵash jasalyp otyr. Búgin 72 jastaǵy qarııaǵa defıbrıllıator qoıyldy. Ol dárigerlerdiń qaraýynda bolǵan, em-dom nátıje bermegennen keıin ota jasadyq», - deıdi astanalyq maman.
Kardıologııalyq ortalyq júrek yrǵaǵy buzylǵan úsh naýqasqa Germanııada jasalǵan qurylǵyny satyp alǵan. SQO kópsalaly aýrýhananyń kardıologııa blogynyń jetekshisi Maqsat Qudrattýlaevtyń aıtýynsha, jyl ótken saıyn osyndaı naýqastardyń sany artýda. Sondyqtan mamandar qajetti otany jergilikti jerde jasaýdy josparlap otyr.
«Júrek yrǵaǵy buzylǵan naýqastarymyz bar. Olardyń júrekteri kenetten toqtap qalyp, qastarynda eshkim bolmasa ólip ketedi. Búginge birneshe naýqasymyzdy ázirledik. Olardy tańdaý joldary bar. Kórsetkishteri durys keletinderine ota jasalady. Buǵan deıin osyndaı ota jasaý úshin Nur-Sultan qalasyna jiberiletin. Endi óz ortalyǵymyzda emdeýdi josparlap otyrmyz. Apparattardy kóktemde aldyq, karantınniń saldarynan sheberlik saǵatyn ótkizýdi keıinge qaldyryp keldik. Búgin sáti túsip jatyr», - deıdi Maqsat Qudrattýlaev.
