SQO-da júrek-qan tamyrlarynan bolatyn ólim-jitim on jyldyń ishinde 2,5 ese azaıdy
PETROPAVL. QazAqparat - Prezıdent Nursultan Nazarbaevtyń kardıologııa jáne kardıohırýrgııalyq qyzmetti jaqsartý maqsatynda jasalǵan baǵdarlamasy aıasynda 2008 jyly Petropavlda kardıologııalyq ortalyq ashyldy. Nátıjesinde, SQO-da júrek aýrýlarynan qaıtys bolatyndardyń sany on jyldyń ishinde 2,5 ese azaıdy, dep habarlaıdy QazAqparat.
Oblystyq kardıologııalyq ortalyqtyń qurylǵanyna bıyl 10 jyl. 2008 jyly ortalyq Petropavldaǵy ekinshi qalalyq aýrýhana negizinde qurylǵan bolatyn. Respýblıkalyq baǵdarlama aıasynda mol qarajat bólinip, dárigerler 10 aı boıy Lıtvadaǵy medıtsınalyq ortalyqta tájirıbeden ótedi.
«Jaqsy kardıohırýrg bolý úshin keminde 10 jyl úlken ortalyqta eńbek etý kerek. Al biz bir jyldyń ishinde ota jasaı bastadyq. Biz Izraılge, Japonııaǵa, Germanııaǵa, taǵy da sondaı medıtsınasy damyǵan elderge dárigerlerimizdi oqýǵa jiberip úırettik. Sonyń arqasynda dárigerlerimiz 2009 jyldan bastap ashyq júrekke ota jasaı bastady, aortokoronarlyq shýnttaýdy. Angıograf degen apparat aldyq. Ol júrektiń aqaýyn tekeseretin qurylǵy. Tamyr qaı jerde bitelgen, qalaı bitelgen, sony tekserip reti kelse júrektiń tamyryna stend qoıady. Al, kelmeıtin bolsa júrekti ashyp aortokoronarlyq shýnt jasaıdy», - deıdi oblystyq kardıologııalyq ortalyqtyń bas dárigeri Azamat Maǵzumov.
Osy aralyqta dárigerler myńdaǵan adamnyń júregine ota jasap, halyqtyń alǵysyna bólendi. Kardıologııalyq ortalyq jańadan ashylǵan kezde dárigerler jylyna 37 aortokoronarlyq shýnt jáne 100-den asa ǵana stend qoısa, sońǵy kezde bul kórsetkish eselep artqan. Qazir munda jylyna 250-ge jaqyn adamnyń júregine ashyq ota jasap, 700-den asa naýqasqa júregine stend qoıylady eken.
Petropavldyq Dýlat Qajkenovtyń kardıologııalyq ortalyqta em alyp jatqanyna shamamen 1 aı. Dárigerler ony ólim aýzynan alyp qaldy. Durys dem ala almaı alqynǵan ol ózi basylady dep júre bergen. Júreginiń 3 birdeı qaqpashasy bitelip qalypty. Aýrýhanaǵa jedel járdemmen jetkizilgen Dýlat Erkinuly birer kúnde óz aıaǵymen úıine ketedi.
«Osynda kelgende jaǵdaı óte múshkil, jaman bolǵan eken. Allaǵa rahmet, ekinshi osyndaǵy dárigerlerge myń da bir rahmet! Telıýk degen Mıhaıl Petrovıch degen dáriger bar eken, sol kisi brıgadasymen dárilerdi berip, ana dúnıeden alyp qaldy. Sosyn es jınaǵasyn, kezek kelgesin operatsııa jasady. Jaǵdaıymyz bar, balalarym Astanaǵa aparaıyq, sol jerde emdelesiń degen. Kelispedim. Óıtkeni, ózimizdiń kardıologııalyq ortalyq týraly jaqsy pikir qalyptasqan. Bilýimshe, elimizdegi eń úzdikterdiń qatarynda. Qazir jaǵdaıym jaqsy, júre almaı júrgem dem ala almaı, endi Alla jazsa merekege deıin úıge baramyn dep oılaımyn», deıdi Petropavl qalasynyń turǵyny Dýlat Qajkenov.
Kardıologııalyq ortalyqta qazir otanyń túr-túri jasalady. Solardyń biri júrekke elektrokardıostımýlıator qoıý. Jylyna osyndaı 170 ota jasalady eken. Ashat Moljigitov - ınterventsııalyq arıtmolog. Ortalyq ashylǵan kúnnen beri osynda eńbek etip keledi.
«Qazir 55 jastaǵy syrqatqa 2 kameralyq elektrokardıostımýlıator qoıdyq. Ota sátti jasaldy. Endi ol 12-15 jyl qalypty ómir súredi, tek jylyna bir ret kelip tekserilip turýy qajet. Júrek qaǵysy buǵan deıin 30-35 bolsa, biz ony eki ese ulǵaıttyq. Bes kúnnen keıin úıine jiberemiz», - deıdi kardıologııalyq ortalyqtyń bas dárigeriniń orynbasary, ınterventsııalyq arıtmolog Ashat Moljigitov.
Qazir kardıologııalyq ortalyqta 7 bólimshe, joǵary deńgeıli 55 dáriger jumys isteıdi. Mamandar dástúrli túrde shet elderde tájirıbe jınaqtap, bilimderin shyńdap otyrady. Emdeý mekemesi qajetti qural-jabdyqpen tolyq qamtylǵan. Mysaly, byltyr oblys ákiminiń qoldaýymen radıobólshektik ablıatsııa apparaty alyndy. Zamanaýı jaraqtandyrylǵan kardıoortalyqtyń kómegine sońǵy jyldary sheteldikter de júginetin bolypty.
«Sońǵy 2-3 jylda biz jylyna 1,5 myńǵa jýyq koronografııalyq zertteý jasaımyz júrekke. 700-den astam adam júregine stend qoıdyq. 250-ge jaqyn naýqasqa júregine ashyq ota jasap, aortokoronarlyq shýnt qoıylady. 10 jylda 15 myń koronarlyq zertteý jasappyz. 2,5 myń adamnyń júregine ashyq ota jasaldy. Bul úlken jetistik. Osynyń arqasynda 2008 jylmen salystyrǵanda júrek aýrýynan ólim sanyn 2,5 esege azaıttyq. Aýrýhanadaǵy ólim sany 5 esege azaıdy», - kardıologııalyq ortalyqtyń bas dárigeri Azamat Maǵzumov.
