SQO-da jumyssyz jastarǵa arnalǵan IT-ortalyqtar ashylady
PETROPAVL. QazAqparat - Soltústik Qazaqstanda jumyssyz júrgen jáne ózin-ózi jumyspen qamtyǵan jastarǵa arnalǵan IT-ortalyqtar ashylady, dep habarlaıdy QazAqparat tilshisi.
«Nur Otan» partııasynyń fılıaly, jumyspen qamtý jáne áleýmettik baǵdarlamalardy úılestirý basqarmasy jáne «Esil» óńirlik damý ortalyǵy osyndaı memorandýmǵa qol qoıdy. Jobanyń alǵashqy jylynda 100-den astam adam oqytylmaq.
«Partııa jańa áleýmettik jobalardy bekitti. Sonyń biri - «Tsıfrlyq partııa» bolsa, ekinshisi - «Balalarǵa arnalǵan tegin ІT-synyptaryn ashý». Osy baǵdarlama aıasynda 3,6 myńnan astam balany oqytýdy josparlap otyrmyz. Al úshinshi joba aıasynda joǵary bilikti mamandar oqıtyn ІT-ortalyqtary ashylady», - deıdi «Nur Otan» partııasy Soltústik Qazaqstan fılıaly tóraǵasynyń birinshi orynbasary Artýr Moldaǵulov.
Onyń aıtýynsha, joba qatysýshylary eń qajetti tsıfrlyq daǵdylardy meńgerip, qazirgi baǵdarlamalaý tilderin úırenedi. ІT-ortalyqty bitirgenderge keleside jumysqa ornalasýǵa kómek beriledi.
ІT-ortalyqtardyń tizimin jumyspen qamtý jáne áleýmettik baǵdarlamalardy úılestirý, bilim basqarmalary belgileıdi. Onyń alǵashqy ekeýi kúzde jurt ıgiligine beriledi. Biri Oqýshylar saraıynda ashylsa, ekinshisi M. Qozybaev atyndaǵy SQMÝ bazasyda qurylady.
