SQO-da jumysshynyń qolynyń basyn julyp ketti

PETROPAVL. KAZINFORM — Soltústik Qazaqstan oblysynda 50 jastaǵy er adam óndiriste jaraqat aldy, onyń qolynyń basy julynǵan. 

SQO densaýlyq saqtaý basqarmasy baspasóz qyzmetiniń málimetinshe, oqys oqıǵa Maǵjan Jumabaev aýdanynda bolǵan. 

Abaısyzda jaraqat alǵan er adamdy aýdandyq aýrýhanaǵa feldsher jetkizdi.

Jumysshynyń oń qolynyń basy astyqty jetkizetin ıirmekte qalyp qoıǵan. 

Aýrýhanaǵa túsken kezde er adamda travmatıkalyq shok bolǵan, kóp qan joǵaltyp, qolynyń basy myjylyp qalǵan. 

Dárigerler ota jasap, jarany óńdedi, bilek býynynyń negizin qalyptastyrdy.

Travmatıkalyq shok toqtatyldy. Naýqastyń jaǵdaıy qazirgi ýaqytta ortasha aýyr bolǵanymen, turaqty.

Oqıǵa týraly memlekettik eńbek ınspektsııasyna habar berildi.

Buǵan deıin Petropavlda jigittiń ústine balshyq qulap, mert bolǵanyn jazǵan edik.