SQO-da júktiliktiń erte merziminde uryq patologııasyn anyqtaıtyn zerthana ashyldy
PETROPAVL. QazAqparat – Petropavldaǵy perınataldyq ortalyqta júktiliktiń erte merziminde uryq patologııasyn anyqtaıtyn Fish zerthana ashyldy, dep habarlaıdy QazAqparat tilshisi.
SQO kópbeıindi aýrýhananyń perınataldyq ortalyǵynda ashylǵan Fish zerthana arqyly mamandar júktiliktiń erte merziminde uryqtyń jaǵdaıyn, sondaı-aq, qandaı da bir aýytqýdyń bar-joǵyn anyqtaıdy.
«Oblysqa Fish zerthana satyp alyndy. Bul óńirdegi alǵashqy osyndaı zerthana. Zerthanada júktiliktiń erte merziminde ishtegi uryqtyń hromosomdyq patologııasyn anyqtaýǵa bolady. Dıagnostıka negizinen qaýip-qater tobyna jatatyn júkti áıelderge jasalady. Zertteý júktiliktiń 16-19-shy aptasynda júrgizilip, 3 kúnde hromosomdyq aýrýlardyń bar-joǵyn anyqtaıdy.
Qaýip-qater tobyna kimder jatady? Eń aldymen áıeldiń anamnezi esepke alynady. Múmkin erli-zaıyptyda buǵan deıin balalary osyndaı aýytqýshylyqpen týǵan shyǵar. Uryq patologııasynyń ýltradybystyq, bıohımııalyq markeri bar ekiqabat áıelder, jasy úlken aıaǵy aýyr áıelder tekserilýi qajet», - deıdi perınataldyq ortalyqtyń tsıtogenetıgi Elena Homıakova.
SQO-ǵa mundaı zerthana burynnan qajet edi. Áıelder tekserilýi úshin Nur-Sultanǵa, Almatyǵa nemese Shymkentke barýǵa májbúr boldy. Endi olar eshqaıda barmaı-aq Petropavlda tekserile alady. Bul jerde uryqtyń 5 patologııasyn anyqtaýǵa bolady.
«Jańa apparatpen jumys isteý úshin Nur-Sultan qalasynda ana men bala ortalyǵynda arnaıy kýrstan ótip, bul quralmen jumys isteı alatynym týraly sertıfıkatqa ıe boldym. Menimen birge ÝDZ apparatynyń dárigeri arnaıy oqyp keldi, ıaǵnı jumys isteıtin mamandar bar.
Barlyq júkti áıelder 100 % genetıkalyq skrınıngten ótedi. Osy jerde markeri barlar ári qaraı tekseriledi. Uryqtaǵy patologııany birinshi trımestrde 20 aptaǵa deıin anyqtap úlgerýimiz qajet», - deıdi Elena Homıakova.
Qazir qondyrǵy ornatylyp, baǵdarlamalar engizilip jatyr. Zerthanany ashýǵa 53 mln teńge jumsaldy.
