SQO-da júkti áıeldiń bosanýyna kómektesken polıtseı marapattaldy
PETROPAVL. QazAqparat – Soltústik Qazaqstan oblysynda áıeldi bosandyrýǵa kómektesken polıtsııa kapıtany QR ІІM «Quqyqtyq tártipti saqtaýǵa qosqan úlesi úshin» medalimen nagradtaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Maǵjan Jumabaev aýdany polıtsııa bóliminiń qyzmetkeri Olga Kangozına 8 qańtar kúni aýyl feldsherine tolǵaǵy qysqan áıeldi bosandyryp alýǵa kómektesken.
Tergeýshi bolyp jumys isteıtin jedel ýákildiń aıtýynsha, bes jyl ishinde qyzmetine baılanysty túrli qıyn sátterdi basynan ótkerip, oǵan eti úırengenimen, bul oqıǵa oǵan eń qıyn synaq bolǵan.
«Bul tek meniń ǵana emes, dárigerlerdiń de eńbegi. Medıtsına qyzmetkerleri men polıtseıler eń aldymen halyqtyń ómiri men densaýlyǵyn saqtaý úshin qyzmet etedi», - deıdi Olga Kangozına.
Polıtsııa kapıtanyna medaldi oblystyq polıtsııa vedomstvosynyń basshysy Marat Tólebaev tabys etti.
«Polıtsııa kapıtany Kangozına oqys jaǵdaıda abdyrap qalǵan joq. Bul qazirgi qazaqstandyq polıtseıdiń beınesi. Tártip saqshysy psıhologııalyq turaqty, ári jyldam qımyldaıtyn, jan-jaqty damyǵan, adamdarǵa qol ushyn sozýǵa daıyn bolý qajet. Olganyń eki joǵary bilimi bar, zańger jáne psıholog. Ózin-ózi damytýǵa umtylý – naǵyz kásibı mamannyń taǵy bir mańyzdy ereksheligi. Laıyqty marapat ony odan ári damýǵa yntalandyra túsedi», - dedi Marat Tólebaev.
