SQO-da júkti áıeldiń jol ústinde qaıtys bolýyna baılanysty qylmystyq is qozǵaldy

Áıelden qan ketip, medıtsınalyq qyzmetkerlerdiń kómegi kerek bolǵan. Biraq, joldyń nasharlyǵynan jedel járdem kóligi óte kesh kelgen. Saldarynan olar áıeldiń ómirine arasha túse almady. 

SQO polıtsııa departamenti baspasóz qyzmetiniń málimetinshe, osy derekke qatysty qylmystyq is qozǵaldy. 

Turǵyndardyń aıtýynsha, aýdandaǵy jol syn kótermeıdi. Osyǵan oraı azamattyq belsendi Serik Baıbekov máseleni kóterip, tıisti organdardyń nazaryn aýdardy. 

Oblys ákiminiń orynbasary Nurlan Keńesov «Presnovka-Qaırankól» joly boıynsha aqparat berdi. 

- Presnovkadan bastap Qaırankólge deıingi joldyń jaǵdaıy ózekti másele. Bul ýchaskeniń uzyndyǵy – 98 km. Sonyń ishinde Blagoveşenka eldi mekeninen Qaırankólge deıingi aralyq jol óte nashar.

Bul ýchaske boıynsha oblys ákimi birinshi kezekte qarjylandyrý týraly tapsyrma berdi. Qazirgi ýaqytta jumysty úsh kezeńde júrgizetin bolamyz. Birinshi kezeńde Qaırankól aýylynan Ýkraınskıı eldi mekenine deıin jóndeledi.

Ekinshi kezeńde Blagoveşenkaǵa deıingi aralyq qamtylady. Sońynda Presnovkaǵa deıin jol salynady, - deıdi Nurlan Keńesov.

Oblys ákimi orynbasarysynyń aıtýynsha, búginde birinshi kezeń boıynsha jobalyq-smetalyq qujat daıyn tur. Saraptama shyqty, jaqynda merdiger kompanııa anyqtalyp, jumys bastalady. 

- Ýkraınskııden Blagoveşenkaǵa deıingi aralyq eki kezeńmen, 20 km-den jóndeledi. Barlyq qajetti – alqaptyq zertteýlerdi júrgizdik, ol jobalyq-smetalyq qujattamany ázirleý úshin qajet.

Jalpy bizde osy joldy jóndeýge qatysty naqty jospar bar. ıAǵnı aldaǵy eki jylda bul ýchaske tolyq jóndeledi, - dedi Nurlan Keńesov.

Buǵan deıin Aqtóbedegi daýyl kezinde zardap shekken júkti áıel jansaqtaý bóliminde jatqanyn jazǵan edik.