SQO-da júk kólik júrgizýshileriniń keıbiri aıyppul tólemeý úshin jalǵan nómirmen júredi
PETROPAVL. KAZINFORM - Soltústik Qazaqstan oblysynda júk kóliginiń keıbir júrgizýshileri zań buzyp, joldardaǵy avtomatty baqylaý júıeleriniń kameralaryna túskenimen, jazasyz qalyp otyr.
SQO ákimdiginde ótken jıynda oblystyq kóliktik baqylaý ınspektsııasynyń basshysy Nursultan Jamashov óńirdegi jaǵdaıǵa toqtaldy.
Qazir óńirde avtomattandyrylǵan eki ólsheý stantsııasy jumys isteıdi. Bul júıe kólikterdiń salmaǵy men gabarıtin avtomatty túrde ólsheıdi. Oblysta stantsııalar byltyr mamyr aıynda qosylyp, nátıjesinde bıylǵy naýryzǵa deıin artyq júkteme jáne gabarıt buzýdyń 747 deregi anyqtalǵan. Alaıda sonyń tek 16% boıynsha ǵana aıyppul rásimdelgen. Qalǵan jaǵdaıda júrgizýshiler jazasyz qalyp otyr. Másele tehnıkanyń álsizdiginde emes, júrgizýshilerdiń aılakerliginde.
- Keıbir júrgizýshiler memlekettik nómirin ádeıi jasyryp, jalǵan nemese ózgertilgen nómirlik belgiler paıdalanyp, tipti baqylaý stantsııalaryn aınalyp ótedi. Sonyń saldarynan tsıfrlyq baqylaý júıesiniń múmkindigi tolyq iske aspaı otyr. Qazirgi tańda basty problema - zańbuzýshylyqty jasyrýdyń joldary kóbeıgen. Sol sebepti memlekettik organdar arasynda birlesken is-qımyl jasaý týraly arnaıy Jol kartasyn bekitýdi usynamyn, - deıdi Nursultan Jamashov.
Bıylǵy úsh aıda avtomattandyrylǵan ólsheý stantsııalary arqyly anyqtalǵan zań buzý faktileri boıynsha 4,4 mln teńge aıyppul tóleý týraly 14 nusqama joldanǵan.
Mamandardyń aıtýynsha, qazirgi ýaqytta SQO aýmaǵynda 7,5 myńǵa jýyq júk kóligi tirkelgen. Onyń ishinde 1435-i – salmaǵy 20 tonnadan asatyn aýyr samosvaldar.
Jalpy byltyr 5,5 myńǵa jýyq júk kóligi tekserilip, anyqtalǵan zańbuzýshylyqtar boıynsha 900-den astam ákimshilik materıal toltyrylǵan. Nátıjesinde jalpy somasy 213,5 mln teńge aıyppul salynyp, óndirildi.
Buǵan deıin taǵy 1,5 myń shaqyrym jolda ortasha jyldamdyqty baqylaý júıesi engiziletinin jazǵan edik.
