SQO-da júk kóliginiń taqtaı tıelgen tirkemesi aýdaryldy
PETROPAVL. QazAqparat – Soltústik Qazaqstan oblysynda tas jolda júk kóliktiń tirkemesi aýdaryldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń habarlaýynsha, 13 qańtar kúni Mamlıýt aýdanynyń Pokrovka eldi mekeniniń janyndaǵy aınalma jolda «KAMAZ» kóliginiń tirkemesi aýdaryldy. Tirkemede 20 tonna taqtaı bolǵan. Kólik júrgizýshisi, Shymkent qalasynyń 42 jastaǵy turǵyny rólge ıe bola almaı qalypty. Ol júkti Reseıdiń Túmen qalasynan Bishkekke deıin jetkizýi tıis bolǵan.
Jergilikti turǵyndar tirkemeni taqtaıdan bosatýǵa kómektesti. Ótip bara jatqan júrgizýshilerdiń biri tártip saqshylaryna habar berdi. Olar óz kezeginde oqıǵa ornyna jyldam jetip, qalǵan qyzmettiń jumysyn uıymdastyrdy. Tótenshe jaǵdaı departamentiniń qyzmetkerleri kranmen tirkemeni kóterse, «Qazavtojol» mamandary tıisti belgiler qoıyp, joldy ýaqytsha japty. Kólik aǵyny «Chelıabi-Novosibir» tas joly arqyly jalǵasty.
«Patrýldi polıtsııa batalonynyń qyzmetkerleri oqıǵa ornynda kezekshilik etip jatyr. Qazir kólikti jóndeý jáne júkti jetkizý máselesi sheshiledi. Bizdiń qyzmetkerler ádette júrgizýshi jolyn jalǵastyrǵansha deıin kómek kórsetedi. Qys mezgilinde mundaı oqıǵalar jıi bolyp turady», - deıdi SQO PD patrýldi polıtsııa batalonynyń komandıri Erlan Madıev.
