SQO-da júk kóligi aýdaryldy
PETROPAVL. QazAqparat – Soltústik Qazaqstan oblysynda tapsyryspen aýylǵa kómir ákele jatqan júk kóligi aýdarylyp, tapsyrys berýshi áıeldi polıtseılerge jedel túrde aýrýhanaǵa jetkizýge týra keldi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqıǵa Jezqazǵan-Petropavl avtojolyndaǵy 933 shaqyrymda bolǵan. «Krasnaıa gorka» aýylyna tapsyryspen kómir alyp bara jatqan «ZIL» kóligi kóktaıǵaqtyń saldarynan joldyń jıegine shyǵyp ketedi. Júrgizýshi jaraqat alǵan joq, biraq mashına búıirinen túsip, kómiri shashylǵan.
Joldan shyǵyp ketken kólikti sol jolda qyzmet kórsetetin patrýldik polıtsııa batalonynyń qyzmetkerleri Mıras Omarov pen Anton Jejera kórgen. Olar Podgornoe aýylynda salynyp jatqan zaýyttyń qurylysynda júrgen jumysshylardan kómek suraıdy. Jumysshylar óz basshylaryna qońyraý shalyp, aýyr tehnıkamen kómekke keldi.
Kómirge tapsyrysty 62 jastaǵy áıel balasymen bergen eken. Olar apat bolǵanyn estip, oqıǵa ornyna jetken. Jol boıynda shashylyp jatqan kómirdi kórip áıel alqynyp, dem ala almaı qalǵan. Polıtseıler ony birden patrýldik kólikke otyrǵyzyp, Petropavlǵa jetkizdi.
«62 jastaǵy áıelge jaqynda júregine ota jasalǵan eken. Birden kardıologııalyq ortalyqqa attandyq. Men kólik júrgizdim, meniń seriktesim áıeldi tynyshtandyryp, sý berdi. Kósheden kedergisiz ótý úshin arnaıy belgini qostyq, dárigerlerge aldyn-ala habarladyq. Kardıologııalyq ortalyqtyń dárigerleri naýqasty arnaıy arbaǵa otyrǵyzyp áketkennen keıin ǵana, onyń senimdi qolda ekenine kózimiz jetkesin keri qaıttyq», - deıdi Mıras Omarov.
Júk kóligin traktor júrgizýshisi tartyp shyǵardy. «ZIL» kóliginiń ıesi tanystaryn shaqyrtyp, kómirdi qaıta tıedi.
Polıtseılerdiń aıtýynsha, kómir jetkizýshi tapsyrys berýshilerden dári-dármekke aqsha qajet bolar dep, kómir tasymaldaǵany úshin aqy almaýdy sheshken.
Al ekinshi kúni «Krasnaıa gorka» eldimekeniniń turǵynynan SQO Polıtsııa departamentiniń bastyǵy Marat Tólebaevtyń atyna aýyrǵan anasyna der kezinde kómek kórsetken tártip saqshylaryna rızashylyǵyn bildirgen alǵys hat keldi.
