SQO-da júk kóliginiń júrgizýshisi áriptesterin betpe-bet soqtyǵysýdan saqtap qaldy
PETROPAVL. KAZINFORM – Soltústik Qazaqstan oblysynda júrgizýshilerdiń qyraǵylyǵy men ózara kómeginiń arqasynda aýyr jol-kólik oqıǵasynyń aldyn alý múmkin boldy.
Áleýmettik jelide eki júk kóliginiń betpe-bet soqtyǵysa jazdaǵan beınejazbasy tarady. Boranda «Shacman» júk kóliginiń júrgizýshisi joldyń qarsy betine shyǵyp ketken. Onyń artynda kele jatqan basqa júrgizýshi qarsy baǵytta «DAF» kóligimen kele jatqan áriptesin ratsııamen eskertip úlgerdi.
SQO Polıtsııa departamenti baspasóz qyzmetiniń málimetinshe, oqıǵa «Astana - Petropavl» avtojolynyń 395-shaqyrymynda bolǵan. Qarsy qozǵalys jolaǵyna 38 jastaǵy «Shacman» júk kóliginiń júrgizýshisi shyǵyp ketken. Der kezinde eskertý nátıjesinde eki júk kóligi soqtyǵysýdan aman qaldy.
Polıtseıler jol qozǵalysy erejesin buzǵan júrgizýshini anyqtap, ákimshilik jaýapkershilikke tartty. Er adam uıytqyǵan qardan baǵytynan jańylǵanyn aıtqan.
Qubylmaly aýa raıyna baılanysty tártip saqshylary profılaktıkalyq túsindirý jumystaryn júrgizip jatyr. Reıd táýliktiń eń qaýipti ýaqyttarynda — keshki saǵat 20:00-den 24:00-ge deıin jáne tańǵy 04:00-ten 07:00-ge deıin júrgiziledi.
- Maýsymaralyq kezeń jaqyndap keledi, oblys joldarynda boran, kóktaıǵaq, qar qursaýy bolýy múmkin. Bizdiń maqsat - jazalaý emes, júrgizýshilerdi qaýip-qaterler týraly aldyn ala eskertý. Sondaı-aq jyldamdyqty asyrý men kólik júrgizý kezinde telefon qoldanýdyń asa qaýipti ekenin eske salamyz, — deıdi oblystyq polıtsııa departamenti bastyǵynyń orynbasary Marat Jumalıev.
Qańtar aıynda SQO aýmaǵynda 26 jol-kólik oqıǵasy tirkelip, 6 adam mert boldy, 36 adam jaraqat aldy. Onyń ishinde 7 apat respýblıkalyq mańyzy bar avtojoldarda bolǵan.
Buǵan deıin Jetisýda Úsharal-Dostyq trassasynda bes kólik jol apatyna ushyraǵanyn jazǵan edik.