SQO-da JRVI juqtyrǵandar sany byltyrǵymen salystyrǵanda 10%-ǵa kóp
PETROPAVL. KAZINFORM — Soltústik Qazaqstan oblysynda jańa epıdemıologııalyq maýsym bastalǵaly beri jiti respıratorlyq vırýstyq ınfektsııany 3 356 adam juqtyrdy.
SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, bul ótken jyldyń sáıkes kezeńimen salystyrǵanda 10,2% kóp.
- Qazirgi ýaqytta oblystaǵy epıdemıologııalyq ahýal turaqty. Degenmen ótken jyldyń sáıkes kezeńimen salystyrǵanda JRVI juqtyrǵandar sanynyń óskeni baıqalady. Al tumaýmen aýyrý ázirge tirkelgen joq, - dedi Áset Jumataev.
Oblysta 6 qazannan bastap halyqty tumaýǵa qarsy ımmýndaý naýqany bastaldy. Osy maqsatta Reseıde óndirilgen «Grıppol Plıýs» vaktsınasynyń 60 myń dozasy satyp alynǵan.
- Vaktsına eń aldymen ınfektsııa juqtyrý qaýpi joǵary toptarǵa salynady. Olardyń qatarynda medıtsına qyzmetkerleri, dıspanserlik esepte turǵan balalar, balalar úıleri men qarttar úıleriniń tárbıelenýshileri jáne turǵyndary bar. Sondaı-aq sozylmaly aýrýlary bar adamdar, júkti áıelder, mektep oqýshylary, egde jastaǵy azamattar vaktsınatsııalaýǵa jatatyn toptarǵa kiredi. Tumaýǵa qarsy ekpe bul adamdarǵa tirkelgen emhanada tegin salynady. Qazirgi ýaqytta oblysta qaýip tobyna jatatyn 6 675 adam vaktsına aldy, - dedi Áset Jumataev.
Mamannyń aıtýynsha, JRVI men tumaýdyń negizgi belgilerine dene qyzýynyń kóterilýi, álsizdik, sharshaý, tamaqtyń aýyrýy jáne murynnyń bitelýi jatady. Mundaıda syrqat ózdiginen emdelmeı, medıtsınalyq kómekke júginýi tıis. Qajet bolǵan jaǵdaıda dárigerdi úıge shaqyrǵan jón. JRVI men tumaý asqynǵan jaǵdaıda pnevmonııa sııaqty qaýipti aýrýlarǵa ákelýi múmkin
Aýrý belgileri bar balalardy balabaqshaǵa nemese mektepke jiberýge bolmaıdy. Bul ınfektsııanyń basqa balalarǵa taralý qaýpin azaıtady.
Al aýrýdyń aldyn alý úshin bólmelerdi kúndelikti jeldetip, qoldy sabyndap jıi jýǵan jón. Adam kóp jınalatyn oryndarǵa barýdy shektep, qajet bolǵan jaǵdaıda medıtsınalyq maska qoldanǵan jón. Sonymen qatar durys tamaqtaný, jetkilikti uıyqtaý jáne dene belsendiligin saqtaý aǵzanyń jalpy jaǵdaıyn jaqsartýǵa kómektespek.
Buǵan deıin synypta qansha oqýshy JRVI juqtyrsa, qashyqtan oqytýǵa kóshetinin jazǵan edik.
