SQO-da JRVI juqtyrǵandar kóbeıdi: dárigerler neni eskertedi

PETROPAVL. KAZINFORM - Soltústik Qazaqstan oblysynda shamamen 1,5 aıdyń ishinde 17,5 myńnan astam adam jiti respıratorlyq vırýstyq ınfektsııa juqtyrdy.

Elordada JRVI aýrýy órshidi
Foto: Astana ákimdigi

Syrqattanǵandar sany artqan. SQO Sanıtarııalyq-epıdemıologııalyq baqylaý departamentiniń málimetinshe, buǵan deıin 2,5 myń adamǵa JRVI dıagnozy qoıylsa, ótken aptada 3226 adam dárigerge qaralǵan. Ázirge óńirde tumaý anyqtalǵan joq.

Oblysta 1 qazannan bastap jańa epıdemıologııalyq maýsym bastaldy.

Mamandardyń málimetinshe, qazirgi ýaqytta JRVI men tumaýǵa qatysty jaǵdaı turaqty. Degenmen aýrý juqtyrǵandar sanynyń artýyna baılanysty turǵyndar saqtyq sharalaryn umytpaǵany jón.

Tumaýdyń aldyn alý úshin óńirde 6 qazannan bastap halyqty ımmýndaý naýqany bastaldy. Qaýip tobyna jatatyn turǵyndarǵa reseılik «Grıppol Plıýs» vaktsınasynyń 60 myń dozasy satyp alynǵan. Qazirdiń ózinde 50,5 myń adamǵa ekpe qoıyldy.

Tegin vaktsınatsııa tirkelgen emhanalarda júrgiziledi. Ekpe aldymen medıtsına qyzmetkerlerine, dıspanserlik esepte turǵan balalarǵa, balalar úıleri men qarttar úıindegi tárbıelenýshilerge usynylady. Sonymen qatar sozylmaly aýrýlary bar adamdar, júkti áıelder, egde jastaǵy turǵyndar, mektep oqýshylary jáne basqa da epıdemıologııalyq qaýip tobyna kiretin azamattar qamtylady.

Mamandar JRVI men tumaýdyń negizgi belgileri - dene qyzýynyń kóterilýi, álsizdik, jalpy álsireý, tamaqtyń aýyrýy jáne murynnyń bitelýi baıqalǵan jaǵdaıda dárigerge qaralýǵa keńes beredi. Aýrý asqynǵan jaǵdaıda ókpe qabynýy sııaqty qaýipti saldarǵa ákelýi múmkin.

Al, juqpaly aýrýlardan qorǵaný úshin dárigerler bólmeni jıi jeldetip, qoldy muqııat jýý, adam kóp jınalatyn oryndarda maska taǵý qajettigin eske saldy. Buǵan qosa, durys tamaqtaný, jetkilikti uıyqtaý jáne dene belsendiligin saqtaý da aǵzanyń qorǵanys qabiletin nyǵaıtýǵa kómektesedi.

Buǵan deıin Batys Qazaqstan oblysynda 1 qazannan beri 9 062 adamnyń JRVI juqtyrǵanyn jazǵan edik.