SQO-da JRVI men tumaý juqtyrǵandardyń arasynda aýyr syrqattanǵandar joq
PETROPAVL. KAZINFORM — Soltústik Qazaqstan oblysynda jiti respıratorlyq vırýstyq ınfektsııa men tumaý juqtyrǵandar sany azaıar emes.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, ótken aptada 2,8 myń adamǵa JRVI dıagnozy qoıylǵan. A/H3N2 tıpti tumaý juqtyrǵan 22 naýqas dáriger kómegine júgindi.
— Epıdemııalyq maýsym bastalǵaly 36 565 adam JRVI-men aýyrdy. Bul ótken jyldyń deńgeıinde qalyp otyr. Syrqattanǵandardyń 24,5 myńy — 14 jasqa deıingi balalar.
Qarasha aıynan beri 195 adam tumaý juqtyrsa, tumaýǵa jatpaıtyn vırýstar — rınovırýs dıagnozy 11 adamǵa, bokavırýs — 8, adenovırýs 4 adamǵa qoıyldy, — deıdi sanıtar dárigerler.
SQO densaýlyq saqtaý basqarmasy baspasóz qyzmetiniń málimetinshe, qazirgi ýaqytta ınfektsııalyq statsıonarda 136 syrqat em alyp jatyr. Aýyrǵandardyń 111-i — balalar. Sondaı-aq 88% — JRVI-men jatyr.
— JRVI negizinen balalar arasynda tarasa, tumaýmen aýyrǵandardyń kópshiligi eresekter. Medıtsınalyq qyzmetkerlerge tumaýmen qaralǵandardyń 118-i eresekter, qalǵan 77-si — balalar.
Qazirgi ýaqytta tumaýdyń, JRVI-diń asqynǵan túrimen jansaqtaý bóliminde em alyp jatqan syrqattar joq. Epıdjaǵdaı baqylaýda. Qajet bolsa medıtsınalyq uıymdar qosymsha ınfektsııalyq oryndar bólýge ázir, — deıdi basqarma ókilderi.
Buǵan deıin Almaty qalasynda bir aptada 14 720 adam tumaý juqtyrǵanyn jazǵan edik.