SQO-da JRVI-men aýyrǵandardyń shamamen 70 paıyzy - balalar
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, epıdemıologııalyq maýsym bastalǵaly óńirde 27 429 adam jiti respıratorlyq vırýstyq ınfektsııany juqtyryp, dárigerge qaralǵan. Bul aldyndaǵy epıdmaýsymmen salystyrǵanda 21 %-ǵa artyq.
Sońǵy bir aptada ınfektsııany 171 adam juqtyrǵan. Mamandardyń aıtýynsha, JRVI-diń beti qaıtty. Óıtkeni onyń aldyndaǵy aptamen salystyrǵanda aýyrǵandar sany 2,9 ese azaıǵan. Epıdemıologııalyq maýsymnyń 11 aptasynda óńirde 499 adamǵa JRVI dıagnozy qoıylǵan edi.
«Vırýstyq ınfektsııamen negizinen balalar aýyryp jatyr. Ótken aptada vırýs juqtyrǵandardyń 68%-y – 117 adam 14 jasqa deıingi balalar. 15-29 jas aralyǵyndaǵylardyń úlesi – 22 adam, bul 12,8%, 30-64 jastaǵylardyń 26-sy nemese 15,2 % aýyrǵan. Al 65 jastan asqandardyń úlesi nebary 4 %, 6 adam dárigerdiń kómegine júgingen. 15 syrqat aýrýhanaǵa jatqyzyldy», - deıdi SQO sanıtarııalyq-epıdemıologııalyq baqylaý departamentiniń ınfektsııalyq jáne parazıttik aýrýlardy epıdemıologııalyq baqylaý bóliminiń basshysy Saltanat Bekqojına.
Bıyl tumaý juqtyrǵandar sany da artqan. Byltyr bir de bir jaǵdaı tirkelmese, bıyl A tıpti tumaýmen aýyrǵan 35 adam anyqtaldy.
«Tumaýdyń aldyn alýdyń eń tıimdi tásili – ekpe saldyrý. Vaktsınany der kezinde qoıdyrý tumaýdyń jeńil ótýine sep, aýrý uzaqqa sozylmaı, asqynbaı tez ótedi. Budan basqa, árıne ımmýnıtetti kóterý qajet: dene shynyqtyrýmen aınalysyp, durys tamaqtanǵan jón, dárýmen-mıneraldar keshenin qabyldaǵan durys. Aýyrǵan adamdarmen ara qashyqtyq saqtap, otyrǵan bólmeni jıi jeldetý, taza ustaý kerek.
Vırýstyq ınfektsııany juqtyrǵan jaǵdaıda úıden shyqpaı, dárigerdi shaqyrý qajet. Otbasynyń basqa múshelerine juqtyrmaý úshin medıtsınalyq maska taǵyp, jeke gıgıena talaptaryn saqtaý kerek. Bul basqalarǵa aýrýdy juqtyrmaý jáne vırýstyq ınfektsııany ári qaraı taratpaý úshin qajet», - deıdi Saltanat Bekqojına.