SQO-da JRVI-ge baılanysty emhanalardyń jumys ýaqyty uzardy
PETROPAVL. QazAqparat - Epıdemıologııalyq maýsym bastalǵaly Soltústik Qazaqstan oblysynda jiti respıratorly vırýsty ınfektsııany juqtyrýdyń (JRVI) 17 416 oqıǵasy tirkeldi. Bul týraly óńirdegi tutynýshylar quqyqtaryn qorǵaý jónindegi departement málimetinde aıtylǵan, dep habarlaıdy QazAqparat.
Vırýstyq ınfektsııalarǵa shaldyǵýdyń kórsetkishi 100 myń turǵynǵa shaqqanda 3 057,6 deńgeıin qurady, bul óz kezeginde ótken jyldyń kezeńinen 66,02 paıyzǵa joǵary boldy. Kóbinese, 14 jasqa deıingi balalar aýyrady, osy oraıda 10 964 jaǵdaı tirkeldi.
Atap aıtqanda, bir aptada JRVI dıagnozymen 133 adam aýrýhanaǵa jatqyzyldy, onyń 9-y júkti áıelder jáne 14-i 1 jasqa deıingi balalar.
Jalpy oblysta tumaýǵa qarsy 60 928 adamǵa nemese jalpy turǵyndardyń 10,7 paıyzyna ekpe jasalǵan.
Departament málimetine qaraǵanda, tumaýmen jáne JRVI-men aýyrǵandardyń sanynyń artýyna baılanysty densaýlyq saqtaý, bilim berý basqarmalaryna sanıtarlyq-profılaktıkalyq sharalar júrgizýge qatysty tıisti qaýlylar shyǵaryldy.
Osy oraıda mektepterde aldyn alý sharalaryn engizýge nusqaý berildi. Bul baǵytta buqaralyq sharalardy shekteý, synyptardy jeldetý úshin sabaq úzilisteriniń ýaqytyn uzartý, dezınfektsııalyq rejimdi kúsheıtý, taǵamdardyń dárýmendik quramyn baqylaý, sondaı-aq basqa da jumystar qamtylǵan.
Qazirgi kezde oblystaǵy medıtsınalyq uıymdarda tıisti sharalar uıymdastyrylyp, emhanalardyń jumysy saǵat 20:00-ge deıin uzartyldy. Munymen qosa, telefon arqyly keńester júrgizilýde. JRVI-ge shaldyqqandardy qabyldaý úshin qosymsha bólmeler jasaqtalyp, úılerde balalar men júkti áıelderdiń jaǵdaıyn medıtsınalyq baqylaý uıymdastyryldy.
