SQO-da jóndelip jatqan eki kópir bıyl paıdalanýǵa beriledi
PETROPAVL. QazAqparat - Soltústik Qazaqstan oblysy Ǵabıt Músirepov aýdanynda kúrdeli jóndelip jatqan eki kópirdiń qurylysy bıyl aıaqtalyp, paıdalanýǵa beriledi, dep habarlaıdy QazAqparat tilshisi.
Aqan-Burlyq ózeni arqyly ótetin jańa kópirdiń qurylysyna baılanysty respýblıkalyq mańyzy bar M-36 «Almaty - Ekaterınbýrg» trassasynyń jumys isteýine múmkindik beretin ýaqytsha aınalma jol salynǵandyǵy buǵan deıin aıtyldy. Qazir Jembaraq ózeninen ótetin eski kópir de buzyp alynyp, jóndeý jumystary bastaldy.
«QazAvtoJol» UK»AQ fılıalynyń dırektory Bolatbek Aıtbaevtiń aıtýynsha, kópirdi paıdalanyp kelgen halyq qıyndyq kórmeıdi. Aınalma jol salyndy. Qajetti qurylys materıaly 100% daıyn. Eki nysanǵa 34 tehnıka, 80 adam jumyldyrylǵan. Jyl basynan jóndeý jumystaryna 2 230 mln teńge jumsalǵan.
«Barmashı ózeni arqyly ótetin Petropavl-Sokolovka avtojolyndaǵy kópirdi kúrdeli jóndeý qolǵa alynbaq. Jobalyq-smetalyq qujattama memlekettik saraptamanyń qaraýynda jatyr. Sondaı-aq bıyl Esil aýdany Pokrovka eldi mekeni janyndaǵy temir kópirdi de jónge keltirmekshimiz», - deıdi Bolatbek Aıtbaev.
Jalpy óńirde respýblıkalyq mańyzy bar avtojoldarda 17 kópir, 5 ótpejol jáne 514 sý ótkizgish qubyr ornalasqan. Respýblıkalyq mańyzy bar avtojoldardy jóndeýge bıyl el qazynasynan 18,8 mlrd teńge bólingen.
