SQO-da jolyn jylda sý basatyn Prıbrejnoe eldi mekeninde kópir qurylysy bastaldy
PETROPAVL. KAZINFORM — Soltústik Qazaqstan oblysy Prıbrejnoe eldi mekeninde salynyp jatqan kópir sý tasqyny kezinde aýyldyń Petropavlmen qatynasyn úzbeý úshin qolǵa alynǵan.
SQO ákimi baspasóz qyzmetiniń málimetinshe, kópirdiń jalpy uzyndyǵy 2 km bolmaq. Nysandy jyl sońyna deıin paıdalanýǵa berý josparlanǵan.
Sondaı-aq Prıbrejnoe aýylyna aparatyn oblystyq mańyzy bar avtomobıl jolyn qaıta jańǵyrtý jumystary júrgizilip jatyr.
Óńir basshysy Ǵaýez Nurmuhambetov sý basý qaýpi bar Qyzyljar, Mamlıýt, M.Jumabaev, Jambyl aýdandary men Petropavl qalasy ákimderiniń, sondaı-aq jaýapty basqarma basshylarynyń qatysýymen jınalys ótkizdi. Kezdesýde kóktemgi sý tasqyny kezeńine daıyndyqtyń negizgi máseleleri qaraldy.
— Qyzyljar aýdany men Petropavl qalasy erekshe baqylaýǵa alyndy. Búginde halyqtyń qaýipsizdigin qamtamasyz etý jáne qaýip-qaterdiń aldyn alý maqsatynda keshendi sharalar qabyldanyp jatyr. Qyzyljar aýdanynda 7 gıdrologııalyq beket jumys isteıdi. Beskólde uzyndyǵy 5,9 shaqyrymdy quraıtyn bógetti qaıta jańǵyrtý jumystary júrip jatyr. Teplıchnoe eldi mekeninde jumystar tolyq aıaqtaldy. Prıbrejnoe aýylynda jumystary aıaqtalýǵa jaqyn, — dedi oblys ákimi.
Ákimdiktiń málimetinshe, 13 aýylda jalpy uzyndyǵy 19 shaqyrym qorǵanys úıindileri salyndy. Qazir Bolshaıa Malyshka, Olshanka jáne Dolmatovo aýyldarynda úıindilerdi ylǵalǵa jáne aıazǵa tózimdi geomembranamen qosymsha nyǵaıtý jumystary atqarylyp jatyr.
Naýryz aıynyń ortasynan bastap ózen-kólderde jarylys jumystary bastalady, bıyl 13 ýchaske belgilendi.
Petropavl aýmaǵynda sý tasqyny qaýpi joǵary aýdandardyń biri — Zarechnyı kenti. Bul jerde jer úıindisin nyǵaıtý, qorǵanys bógetterin salý jumystary aıaqtaldy, uzyndyǵy 4,2 myń metr aınalma kanal qaıta jańǵyrtyldy. Turǵyndardy eldi mekennen kezeń-kezeńmen kóshirý jalǵasqan.
Buǵan deıin SQO-da eki gıdrotehnıkalyq qurylys apatty jaǵdaıda turǵanyn jazǵan edik.