SQO-da joldy ýaqtyly tazartpaǵan merdigerler aıyppul tóledi
PETROPAVL. QazAqparat – Soltústik Qazaqstan oblysynda tártip saqshylary kóktemde joldardyń jaǵdaıyn baqylaýdy kúsheıtti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, joldardyń sapasyn tekserý jumystary kúndelikti júrgiziledi.
«Sý tasqynyna qarsy is-sharalar aıasynda joldardyń qardan tazartylýy búgingi kúnniń basty mindetine aınalǵan. Qardyń der kezinde shyǵarylmaýynan jol tarylady, muz qatyp, oıyqtar paıda bolady. Bul – jol-kólik apatyna ákeledi», - deıdi oblystyq Polıtsııa departamentiniń bastyǵy Marat Tólebaev.
Al eldi mekenderden shyǵarylmaǵan qar keıin erip, jaǵdaıdy ýshyqtyrýy múmkin. Osyǵan oraı polıtsııa sý tasqynyna qarsy is-sharalar aıasynda jol qyzmetterimen birlese áreket etýi tıis.
Marat Tólebaev aýmaqtyq bólimshelerdiń jeke quramyna jergilikti bılik ókilderimen, jol qyzmetterimen, tótenshe jaǵdaılar bólimderimen birge jumys istep, joldardyń, shaǵyn kópirlerdiń, sý ótkizgish qubyrlardyń ýaqtyly qar men muzdan tazartylýyn qamtamasyz etýdi tapsyrdy.
Mamandardyń aıtýynsha, respýblıkalyq joldarda ornalasqan 582 sý ótkizgish qubyrdyń búginde 77-si tazartyldy.
Polıtseıler eki aıdyń ishinde joldyń jaǵdaıyn 207 ret teksergen. Nátıjesinde 299 kemshilik tabyldy. Jergilikti atqarýshy bılik pen jol uıymdaryna mindetti túrde oryndalýy tıis 220 uıǵarym berildi. Túrli jol ýchaskeleriniń jaǵdaıynyń nasharlyǵyna baılanysty laýazymdy tulǵalarǵa 56 ákimshilik hattama toltyryldy. Onyń beseýi boıynsha aldynda berilgen uıǵarymdy oryndamaǵandar aıyppul tóledi. Petropavl qalasy boıynsha ǵana 9 merdiger uıymnyń jetekshileri men ókilderi jaýapkershilikke tartyldy.
