SQO-da joldarynda 28 jańa qurylǵy men 30 baqylaý kamerasy iske qosylmaq

PETROPAVL. QazAqparat – Soltústik Qazaqstan oblysynda jyl sońyna deıin jol júrisi qaǵıdalaryn buzý derekterin tirkeıtin 28 qurylǵy men 30 baqylaý kamerasy iske qosylady, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 1 tamyzdan bastap «Qaýipsiz qala» jobasy aıasynda beınebaqylaý kameralarynyń 30 danasyn, sondaı-aq 28 apparattyq-baǵdarlamalyq keshendi satyp alýǵa shart jasaldy. Qurylǵylar jyldamdyq rejıminiń buzylýyn, toqtaý syzyǵyn kesip ótýdi, baǵdarshamnyń tyıym salynǵan túsine ótýdi tirkeıdi, sondaı-aq kólik aǵynyndaǵy memlekettik nómirlik belgilerdi avtomatty túrde tanıtyn bolady. Búgingi kúni óńirde osy júıelerdi montajdaý, baptaý jáne testileý boıynsha jumystar júrgizilip jatyr.

«Jańa apparattyq-baǵdarlamalyq keshenderdiń iske qosylýy týraly oblys turǵyndary men qonaqtaryn aldyn ala habardar etemiz. SQO PD Ákimshilik polıtsııa basqarmasynyń Facebook jáne Instagram-daǵy resmı paraqshalaryndaǵy aqparatty qarap otyrýǵa keńes beremiz. Paraqshalarda ákimshilik polıtsııa jumysynyń jelisi boıynsha ózekti aqparat únemi jarııalanyp turady. Onda jańa apparattyq-baǵdarlamalyq keshenderdiń ornalasqan oryndary da kórsetiledi», - deıdi SQO PD ákimshilik polıtsııa basqarmasynyń bastyǵy Serik Áljanov.

Aıtýynsha, bul jumys kólik júrgizýshileri tártibin arttyrý, jol-kólik oqıǵalaryn azaıtý jáne jol júrisi qaǵıdalary buzýshylyqtarynyń aldyn alý maqsatynda qolǵa alynǵan.

Búginde oblys ortalyǵy – Petropavlda joldaǵy quqyq buzýshylyqtardy tirkeıtin 7 avtomatty júıe jumys isteıdi. Bul – «Integra» júıesindegi ıntellektýaldy kóshe qıylystary jáne «Mıraj» biriktirilgen júıeleri. Beınekameralardan turatyn bul avtomatty júıe kólik aǵyny joǵary qıylystarda ornatylǵan. Nátıjesinde 9 aıda avtomatty baqylaý-ólsheý quraldary jol júrisi qaǵıdalaryn buzýdyń 5 679 deregin tirkedi.

Jalpy, jyl basynan SQO joldarynda 221 jol-kólik oqıǵasy tirkeldi, 35 adam qaza taýyp, 321 adam jaraqat aldy.