SQO-da joldarǵa jaýapty 60 laýazymdy tulǵa jazaǵa tartyldy
PETROPAVL. QazAqparat – Soltústik Qazaqstan oblysynda joldarǵa tıisti deńgeıde kútim kórsetpegen laýazymdy tulǵalar ákimshilik jazaǵa tartyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetine qaraǵanda, Ákimshilik polıtsııa basqarmasy jumysynyń bir baǵyty – kóshe-joldyń jaǵdaıyn qadaǵalap otyrý. Ásirese kólik aǵyny kóp Petropavlda bul jumys jaqsy jolǵa qoıylǵan.
«Jol ınfraqurylymynyń aqsaýy kólik apatyna ákelýi múmkin. Oblys ortalyǵyndaǵy joldarda oıylǵan asfaltti jıi kezdestiremiz. Bul barlyq shaǵyn aýdandarǵa tán. Joldarǵa jaýapty 60 laýazymdy tulǵaǵa mindetterine salǵyrt qaraǵandary úshin 73 ákimshilik hattama toltyryldy», - deıdi PD Ákimshilik polıtsııa basqarmasynyń asa mańyzdy tapsyrmalar boıynsha aǵa ınspektory Evgenıı Gokın.
Tártip saqshylary joldyń jaǵdaıyn ǵana emes, jol ınfraqurylymynyń barlyq bólshekterin: jol belgilerin, jolaqtaryn, baǵdarshamdardy nazarǵa alady. Polıtseılerdiń aıtýynsha, olardyń jaqsy kórinýi jol qaýipsizdigin qamtamasyz etedi. Olqylyqtardy joıý týraly uıǵarymǵa sáıkes tıisti mekemeler 300 astam jol belgilerin jýyp, syrlap, túzetti. Sondaı-aq lastanǵan 35 baǵdarsham jónge keltirildi. Jolaqtar jańartylyp, shuńqyrlar jóndeldi.
«Jergilikti atqarýshy organǵa jol ınfraqurylymyn damytýǵa qatysty 73 usynys berildi. Nátıjesinde Petropavldaǵy Potanın, «Jas órken» yqshamaýdanyndaǵy Jambyl jáne № 26 orta mekteptiń mańyndaǵy Batyr Baıan kóshelerinde júrginshi joldary paıda boldy», - deıdi Evgenıı Gokın.
Jalpy jyl basynan polıtseıler oblystyń 4 myń shaqyrym jolynyń jaǵdaıyn tekserdi. Nátıjesinde 680 túrli aqaý tabyldy. 60 laýazymdy tulǵa joldy jáne temirjol ótpelerin tıisti deńgeıde kútip ustamaǵany úshin ákimshilik jazaǵa tartyldy.
