SQO-da joldardy tıisti deńgeıde ustamaǵan 60 laýazymdy tulǵa jaýapqa tartyldy

PETROPAVL. QazAqparat – Soltústik Qazaqstan oblysynda joldardyń tazalyǵyna jaýap beretin uıymdarǵa jyl basynan 223 uıǵarym jiberilip, 60 laýazymdy tulǵa jaýapkershilikke tartyldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, qysta joldardyń ýaqtyly tazalanyp, tıisti deńgeıde bolýyn tártip saqshylary baqylaýda ustaıdy. SQO aýmaǵynan halyqaralyq, respýblıkalyq mańyzy bar joldar ótedi. Bul joldarǵa 60 tehnıkasymen «Kazahavtodor» JShS jaýapty. «Petropavl Joldary» JShS men qosalqy merdiger úsh uıym oblystyq jáne aýdandyq mańyzdaǵy joldardy 114 arnaıy tehnıkasymen tazalaıdy. Petropavlda kóshelerdiń qardan taza bolýy 22 kommýnaldyq uıymǵa bekitilgen.

Bıyl qardyń kóptiginen oblys ortalyǵynan qar shyǵarýǵa táýligine 500 mashınaǵa deıin jumyldyryldy. Endi jaıaý júrginshiler jolyn tazalaýǵa basymdyq berilgen.

«Joldardyń sapasyn kúndelikti baqylap otyramyz. Joldarda muz qatsa, qardyń ýaqytynda alynbaýynan eni tarylsa, oıyqtar paıda bolsa – bul jol-kólik oqıǵalaryna ákelip soǵýy múmkin. Zertteýlerdiń qorytyndysy boıynsha olqylyqty joıýǵa uıǵarym beriledi. Máselen naýryz aıynda Omby aınalma jolynan Borkı eldi mekenine deıingi aralyqtyń durys tazalanbaǵanyn anyqtadyq. Jaýapty kásiporynǵa uıǵarym jiberilip, olar 6 saǵattyń ishinde joldy qalypqa keltirdi», - deıdi SQO PD ákimshilik polıtsııa basqarmasynyń bólim bastyǵy Nazar Baımatov.

Jyl basynan polıtseıler jaýapty uıymdarǵa 223 uıǵarym joldady. Joldar men jol qurylystaryn qanaǵattanarlyqsyz deńgeıde ustaǵany úshin 60 laýazymdy tulǵa, onyń ishinde úsheýi uıǵarymdardy oryndamaǵany úshin jaýapkershilikke tartyldy.