SQO-da jolda qalǵan 36 qyrǵyz azamaty qutqaryldy
PETROPAVL. QazAqparat – Soltústik Qazaqstan oblysynda qutqarýshylar 36 jolaýshysymen jolda qalǵan qyrǵyzstandyq nómerli avtobýsqa kómek kórsetti, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, Qyzyljar aýdany Sokolovka eldi mekeniniń mańynda Qyrǵyzstan Respýblıkasynan Reseıge bet alǵan «Setra» avtobýsy synyp qalady. Kólikte Ekaterınbýrgqa bara jatqan 36 adam, onyń ishinde 8 bala bolǵan. Eń kishkentaıy nebary 1 jas 2 aıda ǵana. Qystyń kózi qyraýda jolda qalǵan jolaýshylar qutqarýshylardyń 112 nómirine habarlasyp, kómek suraǵan.
Tótenshe jaǵdaı departamentiniń jedel kezekshileri birden tıisti qyzmetterdi habarlandyrdy. Oqıǵa ornyna Qyzyljar aýdandyq tótenshe jaǵdaılar boıynsha bólimniń, aýdandyq ákimdiktiń mamandary jetti. Polıtsııa qyzmetkerlerimen birge olar jolaýshylardy Sokolov orta mektebine jetkizildi.
«Jolaýshylardy mektep ákimshiligi men «Qarlyǵash» jeke kásipkerliginiń aspazdary qarsy alyp, birden ystyq shaı berdi, tamaqtandyrdy. Olar jylynǵansha kólikti jóndedik. Avtobýstyń tejegish júıesi isten shyqqan eken. Sheteldikter aýqattanyp alyp, birden jolǵa shyǵyp, bizge alǵystaryn bildirdi», - deıdi SQO TJD mamandary.
