SQO-da jolaýshylar tasymalyn sýbsıdııalaýǵa 30 mln. teńge bólinedi
PETROPAVL. QAZAQPARAT - Soltústik Qazaqstan oblysynda áleýmettik mańyzy joǵary baǵyttar boıynsha jolaýshylar tasymalyn sýbsıdııalaý bastaldy, dep habarlaıdy QazAqparat tilshisi.
Qoldanystaǵy zańnamaǵa sáıkes, jergilikti bılik organy áleýmettik mańyzy joǵary tarıfterdi belgilep, bekitýge mindetti. Osy rette Soltústik Qazaqstanda «Petropavl - Aqsýat», «Petropavl - Molodogvardeıskoe», «Petropavl - Qaraqoǵa» baǵyttary tańdap alynyp, sonyń negizinde oblys ákimdiginiń otyrysy barysynda tıisti sheshim bekitildi.
«Oblys boıynsha ortasha baǵa 7 teńgeni quraıdy. Al áleýmettik mańyzy joǵary baǵyttarǵa tarıf 6 teńge dep bekitildi. Baǵany budan tómen túsiretin bolsaq, oblys bıýdjetine salmaq túsetin bolady», - dedi avtomobıl joldary jáne jolaýshylar tasymaly basqarmasynyń bastyǵy Beıbit Іsmanov.
Onyń aıtýynsha, atalǵan úsh baǵyttaǵy avtobýstarǵa oblystyq bıýdjetten jylyna 30 mln. teńge bólinedi.
