SQO-da jol sapasyn tekserýge jasandy ıntellekt qoldanylyp jatyr
PETROPAVL. KAZINFORM – Soltústik Qazaqstan oblysynda jolshylar bıyl respýblıkalyq mańyzy bar bir myńnan astam shaqyrym joldy tekseristen ótkizdi.
Jol aktıvteri sapasy ulttyq ortalyǵy oblystyq fılıalynyń málimetinshe, onyń ishinde kepildik merzimi ótpegen 315 km jol da bar. Júrgizilgen zertteý joldardyń birqatarynda mańyzdy parametrler boıynsha aqaýlar baryn kórsetti. Máselen, 177 km joldyń tegistigi óte qaýipti deńgeıde, 80 km joldyń taıǵaqtyqqa qarsy ilinisý koeffıtsıenti jetkiliksiz bolǵan. Al 6 km jol jamylǵysynyń serpimdiligi tómen bolsa, 38 km-de oıyqtar jol sapasyna áser etken.
Buǵan qosa, ortalyq mamandary Ǵabıt Músirepov atyndaǵy aýdannyń barlyq 446 km jolyna tolyq dıagnostıka júrgizdi. Qazir jınalǵan málimetter óńdelip jatyr.
Ortalyq sońǵy jyldary joldardy dıagnostıkalaý protsesin tolyq tsıfrlandyrýǵa basymdyq berip keledi. Nátıjesinde zamanaýı baǵdarlamaly-ólsheý kesheni iske qosyldy. Ol jol jaǵdaıyn baqylaý, derekter jınaý jáne taldaý jumystaryn burynǵydan áldeqaıda jedel ári dál oryndaıdy.
Ortalyq ınjeneri Erken Ábilmájinovtyń aıtýynsha, buryn joldaǵy árbir jaryq, syzat nemese oıyqty mamandar qolmen qarap, belgileýge májbúr bolǵan. Bul aýqymdy ýaqyt pen kúsh talap etetin.
— Qazir bizde «SRDS» atty jasandy ıntellekt negizindegi júıe bar. Ol jol jamylǵysyndaǵy barlyq aqaýlardy avtomatty túrde tanyp, olardyń ólshemi men uzyndyǵyn ózi eseptep beredi, — deıdi maman.
Jınaqtalǵan aqparat birden tsıfrlyq bazaǵa túsip, ári qaraı Avtomobıl joldary komıtetine joldanatyn resmı esepterdiń negizine aınalady.
Tehnık Ǵalymjan Turǵynovtyń aıtýynsha, mamandar tek joldyń betin ǵana emes, onyń tolyq ınfraqurylymyn da zerttep, jol qujatyn jasaıdy.
— Biz joldyń geometrııasyn, jol belgileriniń, sıgnalyq baǵanalardyń, jol jıegi men kommýnıkatsııalardyń ornalasýyn anyqtaımyz. Barlyq málimetti kartaǵa engizip, kılometrlik syzbalar jasaımyz, - deıdi ol.
Mamannyń aıtýynsha, bul derekter jol sapasyn jaqsartý úshin, jóndeý jumystaryn durys josparlaý jáne qarjyny tıimdi bólý úshin mańyzdy.
Buǵan deıin Qostanaı óńirinde jol sapasyna qatysty 280 kemshilik tirkelgenin jazǵan edik.