SQO-da jol mamandary tóselgen asfalttyń tez buzylý sebepterin túsindirdi
PETROPAVL. KAZINFORM – Soltústik Qazaqstan oblysynda bıyl respýblıkalyq mańyzdaǵy avtojoldardy jónge keltirýge ǵana 22 mlrd-tan astam teńge jumsalmaq.
Jylda osylaısha qomaqty qarajat bólinedi, alaıda, keı joldar bir-eki jylǵa ǵana shydas berip, oıylyp qalady. «Jol aktıvteriniń sapasy ulttyq ortalyǵy» RMK oblystyq fılıaly zerthanasynyń meńgerýshisi Marat Darbaev jańadan tóselgen asfalttiń tez buzylý sebepterin aıtyp berdi.
Mamannyń aıtýynsha, joldyń sapasyn baqylaý ony jobalaý protsesinde qolǵa alynýy tıis. Biraq qarjylandyrýdyń jetkiliksizdigine baılanysty joba qajetti jumystardyń jıyntyǵynan emes, bólingen aqshanyń kólemine balanysty jasalady.
«Eger tehnıkalyq qujattamaǵa engizilgen barlyq komponentterdiń sany saqtalsa, asfalt jabyny sapaly bolyp shyǵady. Biraq, ókinishke oraı, merdiger uıymdar talapty árdaıym saqtaı bermeıdi, saldarynan asfaltbeton jabyny jarylyp, shuńqyrlar, qabyrshaqtaný jáne t. b. aqaýlar paıda bolady. Paıdakúnemdik maqsatta keıbir merdigerler sapasyz materıaldardy qoldanady, tıisti tehnologııany saqtamaıdy, bul asfalttyń beriktigin azaıtady», - deıdi Marat Darbaev.
Desek te barlyq jaǵdaıda joldy jóndeýge tapsyrys berýshiler men merdigerlerdi kinálaǵan durys emes. Jolshynyń aıtýynsha, asfaltbeton jabynynyń sapasy men qyzmet etý merzimine keri áser etetin kóptegen faktor bar.
«Klımattyq jaǵdaı, bul kóktem kezeńindegi eń mańyzdy máselelerdiń biri, kúndiz temperatýra joǵary kóterilip, qar erip, sý mıkrooıyqtarǵa jınalady, keshke qaıta kún sýytyp, saldarynan sý muz bop qatyp, keńeıedi jáne jol jamylǵysy óz qasıetterin joǵalta bastaıdy, úgitilip, jarylady. Mundaı protsess birneshe ret qaıtalanady, saldarynan oıyqtar paıda bolady. Petropavlda nóser káriziniń bolmaýyna baılanysty bul másele óte ózekti, erigen qar sýy baratyn jeri bolmaǵandyqtan jol boıyna jınalady. Al sý - asfaltbetonnyń birinshi jaýy», - deıdi zerthana meńgerýshisi.
Mamannyń aıtýynsha, taǵy bir másele - bul asfalt jabynyna kólik aǵynynyń júktemesi.
«Avtomobıl joldarynyń negizgi jelisi keńes zamanynda jobalanǵan, ıaǵnı burynǵy kólikterdiń oske túsetin júktemesi az bolatyn. Jyl saıyn kólik aǵyny men qarqyndylyǵy artyp keledi, búginde joldarda bir temirjol vagonynyń júgin tasymaldaı alatyn júk kólikteri paıda bolǵan. Bizdiń oblystyń avtojoldarynda júrgiziletin ortasha jóndeý bul júktemege tótep bere almaıdy. Óıtken jumys júrgizilgende negizi aýystyrylmaıdy, tek jabyny ǵana jańartylady. Biraq osyndaı problemalarǵa qaramastan, kepildik kezeńinde paıda bolǵan aqaýlarǵa merdiger, tehnıkalyq qadaǵalaý qyzmeti jáne tapsyrys berýshi jaýapty. Tapsyrys berýshi men merdiger arasyndaǵy shartqa sáıkes kepildik kezeńinde paıda bolǵan aqaýlardy merdiger óz esebinen joıady», - deıdi Marat Darbaev.
Jalpy bıyl «Jol aktıvteriniń sapasy ulttyq ortalyǵy» RMK SQO fılıaly respýblıkalyq avtojoldar boıynsha 23 nysanda atqarylǵan jumystar men materıaldardyń sapasyn iriktep baqylaǵan. 295 synama alynsa, sonyń 58 synamasy, ıaǵnı 20% normatıvtik-tehnıkalyq qujattama talaptaryna sáıkes kelmegen. Búginde olardyń barlyǵy joıyldy.
Oblystyń avtomobıl joldarynda fılıal qyzmetkerleri bes nysandy tekserip, 133 synama alǵan. Onyń 8 synamasynda sýmen qanyǵý, tyǵyzdyq koeffıtsıenti parametrleri boıynsha sáıkessizdikter anyqtaldy. Qazirgi ýaqytta altaýy boıynsha jumys júrgizilip jatyr.
Buǵan deıin Petropavlda tasqynnan keıin súrilýi tıis 2 myńnan astam úıdiń 400-i buzylǵandyǵyn jazǵan edik.
