SQO-da jol-qurylys materıaldarynyń ár tórtinshi synamasy talapqa saı emes
PETROPAVL. KAZINFORM – Soltústik Qazaqstan oblysynda jyl basynan beri avtomobıl joldarynyń sapasyna 291 ret ınspektsııalyq tekserý júrgizilip, jol-qurylys materıaldarynyń 27% normatıvtik talaptarǵa sáıkessizdikter anyqtaldy.
Jol aktıvteri sapasynyń ulttyq ortalyǵy SQO fılıalynyń málimetinshe, mamandar jyl basynan 8 qazanǵa deıingi aralyqta jalpyǵa ortaq paıdalanylatyn avtomobıl joldaryna - respýblıkalyq, oblystyq jáne aýdandyq mańyzy bar joldarǵa, sondaı-aq qalalar men eldi mekenderdiń kóshe-jol jelisine ret baryp tekserdi.
Onyń ishinde 200 tekserý respýblıkalyq mańyzy bar avtomobıl joldarynda, 39-y oblystyq mańyzy bar joldarda, al 52-si aýdandyq mańyzy bar joldar men eldi mekenderdiń kóshe-joldarynda júrgizildi. Tekserý barysynda jol-qurylys materıaldarynyń 1480 synamasy alyndy. Olardyń birqatary belgilengen normatıvtik talaptarǵa sáıkes kelmeıtini anyqtaldy.
Ásirese, respýblıkalyq mańyzy bar joldarda sáıkessizdikter kóp. 1146 synamanyń 264-i normatıvtik talaptarǵa sáıkes kelmedi. 163 aqaý tirkelip, onyń 129-y joıyldy. Sonymen qatar anyqtalǵan sáıkessizdikterge qatysty 82 synama boıynsha tıisti sharalar qabyldanyp, kemshilikter túzetilgen.
Oblystyq mańyzy bar avtomobıl joldarynan alynǵan 152 synamanyń 60-ynda normatıvtik talaptarǵa sáıkessizdikter bolǵan. Bul joldarda 46 aqaý tirkelgen. Esepti kezeńde onyń ekeýi ǵana joıyldy. Sondaı-aq úsh synama boıynsha anyqtalǵan olqylyqtar túzetildi.
Aýdandyq joldar men kóshelerde de kemshilikter bar. Alynǵan 182 synamanyń 77-si normatıvtik talaptarǵa saı bolmady. Bul ýchaskelerde 45 olqylyq anyqtaldy. Alaıda merdiger uıymdar olardy joıý jumystaryn áli bastamaǵan.
Mamandardyń aıtýynsha, negizgi kemshilikter jol-qurylys materıaldarynyń sýǵa qanyǵý kórsetkishterine jáne asfaltbeton jabynynan alynǵan kernderdiń tyǵyzdalý deńgeıine qatysty.
Monıtorıng áli de jalǵasady. Maqsat – kemshilikterdi anyqtap, olardyń ýaqytyly joıylýyn qadaǵalaý jáne jol jumystarynyń belgilengen normatıvtik talaptarǵa sáıkestigin qamtamasyz etý.
Buǵan deıin Shymkentte tekserilgen jol synamalarynyń 224-i talapqa saı bolmaǵanyn jazǵan edik.
