SQO-da jol qozǵalysyn «Kıber-sherıf» baqylaıdy
Soltústik Qazaqstan oblysynda polıtsııanyń patrýldik kólikterine «Kıbersherıf» atty jańa qondyrǵy ornatylyp jatyr. Avtomatty túrde jumys isteıtin keshen jol polıtseıleriniń «qolyn uzartty», dep habarlaıdy Kazinform.
SQO Polıtsııa departamenti baspasóz qyzmetiniń málimetinshe, «Kıber-sherıf» qondyrǵysy ázirge eki patrýldik polıtsııa kóligine ornatyldy. Ár keshende 8 beınekamera bar. Sholý aýmaǵy 360 gradýs, sonymen qatar kólik salonynda bolyp jatqannyń barlyǵyn aýdıo jáne beıne jazbaǵa túsirip alýǵa qaýqarly.
Keshen jyldamdyqty arttyrý, joldyń qarsy betine shyǵyp ketý, qalanyń ishinde belgilenbegen jerge kólikti qańtaryp qoıý sııaqty zańbuzýshylyqtardy avtomatty túrde tirkeıdi. Patrýldik polıtsııa batalonynyń qyzmetkerleri keshenniń jumysyna aralaspaıdy, biraq kameralar jumysynyń barlyq nátıjesi olardyń planshetterine kelip túsedi.
"Jol qaýipsizdigin qamtamasyz etý maqsatynda patrýldik polıtsııa batalonynyń qoldanysyna «Kıber-sherıf» dep atalatyn eki mobıldik apparattyq-baǵdarlamalyq keshen berildi. Jańashyldyq bizdiń tehnıkalyq múmkindigimizdi arttyrdy. Olardyń kómegimen jyldamdyq rejımin jáne basqa da zańbuzýshylyqtardy tirkeýge bolady.
Máselen izdeýde júrgen kólik quraldaryn, quqyq buzýshylyqtardy polıtsııa qyzmetkeriniń qatysýynsyz avtomatty túrde tirkeıdi.
«Kıber-sherıftiń» basty ereksheligi – oqylmaıtyn, kórinbeıtin memlekettik nómirlerdi qashyqtyqtan tanyp, urlanǵan kólikterdi nemese qashyp júrgen boryshkerlerdi anyqtaıdy. Sondaı-aq keshen qarsy kele jatqan mashınalarda saqtandyrý polısiniń jáne tehnıkalyq baıqaýdyń ótýi týraly kýáliktiń bar-joǵyn avtomatty túrde kórsetedi», - deıdi SQO PD Ákimshilik polıtsııa basqarmasynyń bastyǵy Serik Áljanov.
Mamandardyń aıtýynsha, zań buzýshylyqtardy avtomatty túrde tirkeıtin beınebaqylaý júıeleri óz tıimdiligin kórsetti. Intellektýaldyq kameralar ornalasqan jerdegi kóshe qıylystarynda birde-bir aýyr jol-kólik oqıǵasy bolmaǵan. Jyl basynan oblysta avtomattandyrylǵan júıeler jol júrisi qaǵıdalaryn buzýdyń 76 myńnan astam deregin anyqtady.
