SQO-da jol-kólik oqıǵasynda zardap shekken boıjetken tilge kelmesten qaıtys boldy

PETROPAVL. KAZINFORM – Soltústik Qazaqstan oblysynda jol-kólik oqıǵasynda jaraqat alǵan 20 jastaǵy boıjetken bir aptadan keıin qaıtys boldy.

SQO Densaýlyq saqtaý basqarmasy baspasóz qyzmetiniń málimetinshe, aýyr jaraqattyń saldarynan komaǵa túsken qyzdy ókpeni jasandy jeldetý apparatyna qosyp, júrek-qan tamyr qyzmeti arnaıy preparattardyń kómegimen jumys istedi. Jol-kólik oqıǵasy kezinde onyń ómirlik mańyzdy organdaryna zaqym kelgen, jabyq bas-mı jaraqatyn alǵan, qan quıylyp, bas súıegi birneshe jerden synǵan.

Sol jol-kólik apatynda jaraqattanǵan 45 jastaǵy áıeldiń de jaǵdaıy nashar, es-tússiz jatyr. Ol da bas súıek jaraqatyn alǵan, mıy soǵylyp, qan quıylǵan, mańdaıy jyrtylyp, bas súıegi synǵan.

Esterińizge salaıyq, jol-kólik oqıǵasy 2 aqpan kúni «Jezqazǵan-Petropavl» tas jolynda, Esil aýdanynyń Pokrovka men Petrovka eldi mekenderiniń aralyǵynda bolǵan. «Howo» júk kóligi men «Toyota Camry» soqtyǵysyp, saldarynan jeńil mashınanyń 43 jastaǵy júrgizýshisi sol jerde kóz jumdy.

«Toyota Camry» kóliginiń tórt jolaýshysy: 45-tegi áıel, 20 jastaǵy boıjetken jáne 16 men 17 jastaǵy jasóspirimder túrli jaraqatpen emdeý mekemelerine jetkizildi.