SQO-da jol-kólik apattarynyń 14 paıyzyna taksıdiń qatysy bolǵan
PETROPAVL. KAZINFORM – Soltústik Qazaqstan oblysynda polıtseıler apattylyqty taldap, jol-kólik oqıǵalarynyń negizgi sebepterin anyqtady.
SQO polıtsııa departamenti baspasóz qyzmetiniń málimetinshe, jol-kólik oqıǵalarynyń 14% taksılerdiń qatysýymen bolǵan. Zardap shekkender bolmasa da, kólik quraldaryna mehanıkalyq zaqym kelgen. Osyǵan oraı ákimshilik polıtsııa basqarmasynyń qyzmetkerleri Petropavldaǵy taksoparkterdiń birinde kezdesý ótkizdi. Reıs aldyndaǵy talaptardyń durys oryndalýyna kóz jetkizip, sondaı-aq júrgizýshilermen profılaktıkalyq áńgime ótkizdi.
Petropavlda qazir tórt iri taksopark bar. Marshrýtqa shyǵar aldynda árbir júrgizýshi medıtsınalyq tekserýden ótedi, onyń ishinde alkotester de bar. Avtokólikterdiń reıs aldyndaǵy tehnıkalyq jaǵdaıy da esepke alynady.
- Apattylyqty taldaý barysynda jol-kólik oqıǵalaryna kólik basqarý kezinde uıaly telefondy paıdalaný negizgi sebeptiń biri ekenin anyqtadyq. Jolda telefon qaraýdyń qaýipti ekeni týraly tájirıbeli júrgizýshilerge de eske salýǵa týra keledi. Mundaı kezdesýler barlyq taksoparkterde turaqty túrde ótkiziletin bolady. Biz olarmen memorandýmǵa qol qoıýdy josparlap otyrmyz. Nátıjesinde bizdiń qyzmetkerler belgili bir merzim boıynsha kólikter men júrgizýshilerdi reıske jiberý tártibin baqylap, praktıkalyq keńester beredi. Árbir zańdy taksıge otyrǵan jolaýshy óziniń saqtandyrylǵanyn, tehnıkalyq jaramdy kólikpen muqııat júrgizýshi tasymaldap kele jatqanyn bilýi tıis, - deıdi ákimshilik polıtsııa basqarmasynyń bastyǵy Serik Áljanov.
Buǵan deıin Almaty-Óskemen trassasynda avtobýs pen júk kóligi soqtyǵysyp, júrgizýshi mert bolǵanyn jazǵan edik.
