SQO-da jol-kólik apatynan 5 adam mert boldy

PETROPAVL. QazAqparat – Soltústik Qazaqstan oblysy arqyly ótetin «Kókshetaý-Omby» avtojolynyń boıynda eki kólik soqtyǵysyp, 5 adam qaza tapty, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 16 maýsym saǵat 7:55-te Taıynsha aýdany Aımaq aýylynyń mańyndaǵy «Kókshetaý-Omby» avtojolynyń 53-shaqyrymynda «Lexus» jáne «VAZ-2104» avtomashınalary soqtyǵysty.

Polıtseılerdiń aıtýynsha, «Lexus» avtomashınasy Kókshetaý qalasynan kele jatqan, jolda kólik qarsy jolaqqa shyǵyp ketken.

Jol-kólik apaty saldarynan 7 adam zardap shekti: 5 adam oqıǵa ornynda qaıtys boldy, onyń ekeýi eki avtokóliktiń júrgizýshileri. Al, jaraqat alǵan eki adam medıtsınalyq kómek kórsetý úshin Kókshetaý qalasyndaǵy aýrýhanaǵa jetkizildi.

Júrgizýshilerden medıtsınalyq kýálandyrý júrgizý úshin qan alyndy.

Kólik quraldary mamandandyrylǵan avtoturaqqa qoıyldy.

Osy oqıǵaǵa qatysty QR Qylmystyq kodeksiniń 345-baby 4-bóligi boıynsha («Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy abaısyzda eki nemese odan da kóp adamnyń ólimine ákep soqqan is-áreket») sotqa deıingi tergep-tekserýlerdiń biryńǵaı tizilimine tirkelgen. Qajetti saraptamalar taǵaıyndaldy.