SQO-da jol-kólik apatynan 4 adam mert boldy

PETROPAVL. QazAqparat – Soltústik Qazaqstan oblysyndaǵy «Astana-Petropavl» tasjolynda eki kólik soqtyǵysyp, 4 adam oqıǵa ornynda qaza tapty, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, jol-kólik oqıǵasy búgin saǵat 6:00 shamasynda «Astana-Petropavl» avtojolynyń 384-shaqyrymynda bolǵan. Petropavldyń 51 jastaǵy turǵyny «Toyota Land Cruiser Prado» kóligimen Kókshetaý qalasy jaqtan kele jatqan. Al, 51 jastaǵy jáne bir petropavldyq tirkemesi bar «Audi 100» avtokóligimen oblys ortalyǵynan qarsy baǵytta bet alǵan.

Jol-kólik oqıǵasynan eki kóliktiń de júrgizýshisi, «Audi 100» avtokóliginiń 51 jáne 40 jastaǵy jolaýshylary – Petropavl turǵyndary qaza tapty.

Atalǵan fakti QR Qylmystyq kodeksi 345-babynyń 4-bóligi «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha Sotqa deıingi tergep-tekserýlerdiń biryńǵaı tiziliminde tirkeldi.

Saraptamalar taǵaıyndaldy. Іstiń mán-jaıyn jan-jaqty zerdeleýge baǵyttalǵan tergeý áreketteri júrgizilip jatyr, olardyń nátıjeleri boıynsha túpkilikti protsessýaldyq sheshim qabyldanady.

SQO polıtseıleri keshe ǵana kún raıynyń buzylýyna baılanysty júrgizýshiler men jaıaý júrginshilerge jolda saq bolýdy eskertken edi. Óńirde túnde aýa raıy kúrt sýytyp, bir kúnde qys tústi.