SQO-da jol-kólik apatynan 2 adam mert boldy
PETROPAVL. QazAqparat – Soltústik Qazaqstan oblysynda jeńil kólik KamAZ-ben soqtyǵysyp, saldarynan eki adam kóz jumdy, dep habarlaıdy «QazAqparat» HAA tilshisi.
SQO Polıtsııa departamenti baspasóz qyzmetiniń málimetinshe, jol apaty 11 tamyz kúni saǵat 15.20 shamasynda Qyzyljar aýdany Penkovo aýylynyń mańynda bolǵan. «Chelıabi - Novosıbır» avtojolynda Toyota Camry kóligin basqarǵan Maǵjan Jumabaev aýdanynyń 62 jastaǵy turǵyny qarsy baǵytqa shyǵyp ketip, Býlaevo qalasynyń 56 jastaǵy turǵyny tizgindegen KamAZ avtokóligimen betpe-bet soǵylǵan.
Toyota Camry avtokóliginiń júrgizýshisi jáne onyń 1957 jylǵy jolaýshysy alǵan jaraqattarynan oqıǵa ornynda qaza tapty. KamAZ júrgizýshisi zardap shekken joq.
SQO PD bastyǵynyń birinshi orynbasary Qanat Aıtbaevtyń aıtýynsha, jol-kólik oqıǵasy deregi Sotqa deıingi tergep-tekserýdiń biryńǵaı tizilimine engizildi. Birqatar saraptama taǵaıyndaldy.
Aıta keteıik, bıylǵy 7 aıda SQO-da 98 jol apaty tirkeldi. Saldarynan 13 adam qaza taýyp, 129-y jaraqat aldy.
