SQO-da jol-kólik apattary jıi bolatyn avtojoldar ataldy
PETROPAVL. QazAqparat – Soltústik Qazaqstan oblysynda bıyl 46 jol-kólik oqıǵasy boldy. Saldarynan 13 adam kóz jumyp, 84-i zardap shekti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, óńir joldarynda qaýipti ýchaskeler jeterlik. Qys mezgiliniń bastalýyna baılanysty kólik júrgizýshileri saqtyqty eki ese arttyrǵan jón. Qar men muz kólikti basqarýdy qıyndatady, al bul jol-kólik apatyna alyp kelýi múmkin. Jyldamdyqty asyrýǵa ruqsat etilgen qala syrtyndaǵy joldarda, dóńderde, eńisterde, ekinshi dárejeli joldarmen qıylystarda, eldi mekenderden shyǵa beristerde, jolǵa jaqyn orman ornalasqan aýmaqtarda asa saq bolǵan abzal.
SQO-daǵy respýblıkalyq mańyzdaǵy joldarda 10 aıda 46 jol-kólik oqıǵasy tirkelip, 13 adam kóz jumdy, 84 adam jaraqattandy. Apattardyń basym bóligi – Qyzyljar aýdanynyń joldarynda bolǵan, olardyń sany – 14. Aýdandaǵy eń qaýipti ýchaskeler – «Chelıabi-Novosibir» tasjolyndaǵy Penkovo, Asanovo, Metlıshıno, Toqshyn, sondaı-aq ıAkor, Sokolovka, Krasnoıarka, Jelıakovo eldi mekenderiniń mańy, «Petropavl-Ishım» M-51 avtojolynyń 11-shi shaqyrymyndaǵy qıylys.
«Oblys aýmaǵynda júrýge qolaıly ýchaskeler bar. Alaıda bul aýmaqtarda da oblystaǵy ortasha kórsetkishke qaraǵanda jol-kólik oqıǵalary jıi bolyp turady. Mundaı ýchaskelerge «Petropavl-Nur-Sultan» tas jolynyń Qyzyljar aýdanyndaǵy Chapaevo, Trýdovaıa Nıva aýyldarynyń arasy, Aqqaıyń aýdanynyń Aralaǵash aýyly mańy, «Petropavl-Jezqazǵan» trassasyndaǵy Esil aýdanynyń Nıkolaevka aýyly mańy kiredi. Bul ýchaskelerde aýyl maly jol ústine shyǵyp ketýi múmkin. Bul jerlerde óte muqııat bolǵan jón», - deıdi SQO PD Ákimshilik polıtsııa basqarmasynyń bastyǵy Serik Áljanov.
