SQO-da jol erejesin buzǵandar ıntellektýaldy beınejúıe arqyly anyqtalady

PETROPAVL. QazAqparat – Soltústik Qazaqstan oblysynda polıtseıler sheteldik tirkeýde turǵan jáne júıeli túrde jol erejelerin buzatyn avtokólikterdiń ıelerin anyqtap, aıyppul salyp jatyr, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, jergilikti polıtsııa qyzmeti basqarmasynyń izdestirý toby ıntellektýaldy beınejúıeler men «Megakam.Qorǵaý» qosymshasy arqyly jol erejesin qasaqana buzýshyny anyqtady.

Mamyr aıynda sheteldik esepte turǵan «VAZ-21114» markaly avtokóliginiń júrgizýshisi Petropavl kóshelerinde jol erejesin 5 ret buzǵan. Onyń bári avtomatty túrde tirkeý júıeleriniń kómegimen anyqtaldy. Kólik týraly derekter «anyqtalmaǵan júrgizýshi» bazasyna engizildi. Іzdestirý toby «Megakam.Qorǵaý» júıesin paıdalanyp, izdeýde júrgen avtokólikti anyqtady. Júrgizýshi jyldamdyqty asyrǵan jáne onyń saqtandyrý polısi bolmaǵan. Zańdy buzǵan ol ákimshilik jaýapkershilikke tartyldy. Avtokólik arnaıy aıyp turaǵyna qoıyldy.

«Qazirgi zamanǵy tehnıka – polıtsııanyń senimdi kómekshisi. 5 aı ishinde izdestirý tobynyń qyzmetkerleri avtomatty rejımde jumys isteıtin arnaıy tehnıkalyq quraldarmen jol erejesin júıeli jáne óreskel buzǵan sheteldik esepte turǵan kólikterdiń 108 júrgizýshisin ustady», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.