SQO-da jol erejesin buzǵan qoǵamdyq kólik júrgizýshilerine 800-ge jýyq aıyppul salyndy
PETROPAVL. QazAqparat – Soltústik Qazaqstan oblysynda bıyl qoǵamdyq kólik júrgizýshileriniń kinásinen bir adam mert bolyp, 10 adam jaraqattandy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, «Jezqazǵan - Petropavl» avtojolynda patrýldik polıtseıler Petropavl men Ǵabıt Músirepov atyndaǵy aýdan arasynda qatynaıtyn avtobýsty toqtatty. Qujattardy tekserý barysynda 51 jastaǵy júrgizýshide qajetti «D» sanaty bolmaǵan. Oǵan QR Ákimshilik quqyq buzýshylyq týraly kodeksiniń 612-baby 2-bóligi boıynsha hattama toltyryldy. Avtobýs balansta turǵan JShS dırektory da ákimshilik jaýapkershilikke tartyldy.
Jalpy jyl basynan óńir joldarynda jolaýshy tasymaldaıtyn kólikterdiń qatysýymen 4 jol-kólik oqıǵasy tirkelgen. Saldarynan 1 adam qaza taýyp, 10 adam jaraqattandy. Polıtsııa qyzmetkerleri avtobýs júrgizýshileri tarapynan jol erejesin buzý jıi tirkeletinin aıtty.
«Sońǵy 7 aıda qoǵamdyq kólik júrgizýshileriniń jolda júrý erejesin buzýdyń 766 deregi anyqtaldy. Sonyń 170-inde rólde otyryp telefondy qoldanǵan, 140-y - manevr jasaý qaǵıdalaryn buzýǵa jáne 54-i tehnıkalyq tekserýden ótpeýge qatysty. Mas kúıde kólik basqarǵan 1 júrgizýshi ustaldy. Budan bólek, túrli quqyq buzýshylyqtar úshin avtobýs parkiniń 9 laýazymdy tulǵasy jaýapkershilikke tartyldy», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Budan bólek, jolaýshy tasymalymen zańsyz aınalysyp júrgen taksı júrgizýshileri de tekserildi. Nátıjesinde tıisti tirkeýden ótpeı kásipkerlikpen aınalysqan 36 adam jaýapkershilikke tartyldy.
Buǵan deıin Petropavl saıabaqtarynyń birinen granata tabylǵanyn aıtqan edik. Oqıǵa ornyna jetken arnaıy mamandar kúdik týdyrǵan zattyń «ÝZRGM» tıpti oqytý granatasy ekenin anyqtady.
