SQO-da jol belgilerine qatysty 300-den astam kemshilik anyqtaldy
PETROPAVL. KAZINFORM - Soltústik Qazaqstan oblysyndaǵy respýblıkalyq mańyzy bar avtomobıl joldaryndaǵy jol belgileriniń tehnıkalyq jaı-kúıi, kóriný deńgeıi jáne qaýipsizdik talaptaryna sáıkestigi baǵalandy.
Jol aktıvteri sapasynyń ulttyq ortalyǵy SQO fılıalynyń málimetinshe, mamandar QR Kólik mınıstrliginiń tapsyrmasy aıasynda respýblıkalyq mańyzy bar jol ýchaskelerinde ınspektsııalyq tekserý jumystaryn júrgizip jatyr.
Tekserý barysynda jolshylar jol belgileriniń normatıvtik-tehnıkalyq qujattama talaptaryna sáıkestigin baǵalady.
Búgingi kúnge deıin óńirdegi respýblıkalyq joldarda ornalasqan 15 820 jol belgisi tekserilgen. Nátıjesinde olardyń 305-i qoldanystaǵy talaptarǵa sáıkes kelmeıtini anyqtaldy. Atap aıtqanda, keıbir jol belgilerinde jaryq qaıtaratyn úldir múlde bolmaǵan nemese búlingen. Sonymen qatar belgilerdiń talapqa saı ornalastyrylmaýy, baǵandardyń qısaıýy, tirekter men bekitý elementteriniń tot basýy, belgilerdiń mehanıkalyq zaqymdanýy sııaqty aqaýlar anyqtalǵan.
Sondaı-aq jaryq qaıtaratyn qasıeti álsiregen jol belgileri de kezdesken. Bul olardyń túngi ýaqytta júrgizýshilerge kórinýin qıyndatyp, jol qozǵalysy qaýipsizdigine keri áser etýi múmkin. Osy kemshilikter týraly aqparat jaýapty uıymdarǵa joldanyp, olardy joıý boıynsha tıisti usynystar berildi.
Mamandardyń aıtýynsha, mundaı ınspektsııalyq tekserýler jol ınfraqurylymyndaǵy aqaýdy der kezinde anyqtap, olardy joıýǵa múmkindik beredi. Bul jol qozǵalysy qaýipsizdigin arttyrýǵa jáne jol paıdalanýshylar úshin qolaıly jaǵdaı jasaýǵa yqpal etedi.
Avtomobıl joldary men jol ınfraqurylymy nysandarynyń jaı-kúıin monıtorıngteý jumysy áli de jalǵaspaq.
Buǵan deıin Abaı oblysynda jol qaýipsizdigin arttyratyn 13 lazerlik keshen ornatylǵanyn jazǵan edik.
