SQO-da jol apatynan avtokólik órtenip, 5 adam jaraqattandy
PETROPAVL. QazAqparat – Soltústik Qazaqstan oblysynda jol-kólik oqıǵasy kezinde avtokólik órtenip, júrgizýshisi men 4 jolaýshysy túrli jaraqatpen aýrýhanaǵa jetkizildi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, jol-kólik oqıǵasy Taıynsha aýdanynda bolǵan. 22 jastaǵy kólik júrgizýshi kele jatqan kólikti basyp ozbaq bolyp, kólik tizginine ıe bola almaı qalǵan. Saldarynan joldan shyǵyp ketip, mashına aýdarylyp qalady. Avtokólik órtenip, tolyq janyp ketti. Al kólik júrgizýshisi men 4 jolaýshysy túrli jaraqatpen aýrýhanaǵa jetkizildi.
Sondaı-aq, mamyr aıynyń sońǵy kúnderi Aqqaıyń aýdanynda jol-kólik oqıǵasy tirkeldi. Nur-Sultan qalasynyń 28 jastaǵy turǵyny burylysta kólik tizginine ıe bola almaı, aýdarylyp qaldy. Er adam alǵan jaraqatynan oqıǵa ornynda kóz jumdy.
Al 8 maýsym kúni Qyzyljar aýdanynda Chelıabi-Novosibir avtojolynda Toyota Coroll men «VAZ 2114» avtokólikteri soqtyǵysty.
Jalpy SQO-da 5 aıda respýblıkalyq jáne oblystyq mańyzdaǵy joldarda 26 jol-kólik oqıǵasy tirkelgen.
«Ádette, jazdyń kelýimen jáne azamattardyń kóptep eńbek demalysyna shyǵýymen joldarda kólik sany artady. Osyǵan baılanysty jol ústinde saq bolýǵa, alys jolǵa shyǵarda qaýipsizdikke jaýapkershilikpen qaraýǵa, Jol júrisi qaǵıdalaryn qatań saqtaýǵa shaqyramyz. Jol júrisi qaǵıdalaryn elemeý osyndaı jaǵdaılarǵa alyp kelýi múmkin. Ár manevr erekshe saqtyqpen jasalýy qajet. Alda kele jatqan kólikti basyp ozý kezinde manevrdiń qaýipsiz ekendigine kóz jetkizip alǵan jón. Sondaı-aq, eldi mekender janynan ótkende jyldamdyqty tómendetken abzal, úı janýarlary jolǵa kenetten shyǵa kelýi múmkin», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
SQO joldarynda bes aıda jyldamdyq rejımin saqtamaý saldarynan 7 jol-kólik oqıǵasy tirkeldi, 1 adam qaza taýyp, 8 adam jaraqattandy. 15 jol-kólik oqıǵasynda júrgizýshiler manevrdiń qaýipsiz ekenine kóz jetkizbegen, saldarynan 5 adam kóz jumyp, 26 adam jaraqattandy.
