SQO-da jol apattarynda bıyl úsh adam qaza taýyp, 65-i jaraqattandy
SQO polıtsııa departamenti baspasóz qyzmetiniń málimetinshe, óńirde jyl basynan beri 35 jol-kólik oqıǵasy tirkelgen. Saldarynan úsh adam qaza taýyp, 65 adam jaraqat aldy. Qaza tapqandardyń ishinde bir bala bar jáne bes jasóspirim jaraqat alǵan.
Jol-kólik oqıǵalarynyń eń kóp taraǵan túri – betpe-bet soqtyǵysý, osyndaı 20 apat boldy, 45 adam jaraqattandy, 3 adam qaza tapty.
Tájirıbe kórsetkendeı, bul kóbine manevr jasaý erejelerin buzý, qarsy jolaqqa shyǵý, baǵdarshamnyń tyıym salynǵan sıgnalyna ótý, negizgi jolmen kele jatqan kólikti ótkizbeı, qıylystardyń ótý kezektiligin buzý kezinde bolady.
«Jol qatelikti keshirmeıdi. Sondyqtan avtokólik júrgizýshilerin jol qozǵalysy erejeleriniń talaptaryn qatań saqtaýǵa jáne joldarda qyraǵy bolýǵa shaqyramyz. Qıylystardan ótý kezektiliginiń erejelerin saqtamaý, qarsy jolaqqa shyǵý jáne basqa da óreskel buzýshylyqtar aýyr zardaptary bar jol-kólik oqıǵalaryna ákep soǵady», - deıdi SQO PD JPQ basqarmasynyń bastyǵy Aıdyn Baımatov.
Sondaı-aq jol-kólik oqıǵalaryna ákeletin negizgi sebepke jyldamdyqtyń artýy jáne ara qashyqtyqty saqtamaý jatady.
«Sonymen qatar mas júrgizýshilerdiń kinásinen úsh jol apaty boldy. Onyń saldarynan bes adam jaraqat aldy. Jol-kólik oqıǵalarynyń taǵy bir keń taraǵan túri – jaıaý júrginshilerdi soǵyp ketý. Jyl basynan beri osyndaı 9 oqıǵa tirkeldi. Olarda 9 adam zardap shekti, al tórteýi belgilenbegen jerde nemese baǵdarshamnyń tyıym salý sıgnalyna ótýine baılanysty jaraqat aldy. Qozǵalystyń barlyq qatysýshylaryna jaıaý júrginshiler ótkelderinde erekshe qyraǵylyq tanytýǵa keńes beremiz. Apatty azaıtý úshin polıtsııa qyzmetkerleri jedel-profılaktıkalyq jáne reıdtik is-sharalardy turaqty túrde júrgizedi», - deıdi Aıdyn Baımatov.
Aıta keteıik, SQO-da «Qaýipsiz jol» jedel aldyn alý is-sharasy bastaldy. Atalǵan is-sharalar quqyqtyq tártipti nyǵaıtýǵa jáne qozǵalystyń barlyq qatysýshylarynyń tártibin arttyrýǵa baǵyttalǵan.
